DILI, STLNEWS.co – Reprezentante Food And Agriculture Organization (FAO) ba Timor Leste no Indonezia, Rajendra Aryal hatete, ohin sira mai koalia konaba asuntu agrikultura, seguransa alimentar no nutrisaun, inklui problema konaba bee ba Prezidente Republika, Jose Ramos Horta.
“Iha enkontru nee hau agradese ba Xefi Estadu ninia lideransa iha asuntu seguransa alimentar, agrikultura no floresta. Ami troka ideia oinsa mak bele hametin kolaborasaun area sira nee iha Timor Leste,” dehan Reprezentante FAO ba Timor Leste no Indonezia, Rajendra Aryal, ba jornalista sira hafoin remata sorumutu ho Prezidente Republika Horta iha Palasiu Prezidensial, Bairu Pite, Dili, Kuarta nee (27/07/2022).
Reprezentante FAO nee relata, iha sorumutu nee sira koalia mos asuntu mudansa klimatiku no dezastre neebe akontese iha rai barak, neebe fo mos impaktu ba Timor.
Iha biban nee, Prezidente Republika, José Ramos Horta, hakarak haree oin nusa mak nasaun nee bele iha soberania ai haan no mos bele melhora nutrisaun ba populasaun, entaun Xefi Estadu hakarak tebes-tebes konvoka kolaborasaun husi parte hotu-hotu atu bele melhora investimentu setor agrikultura hodi responde ba mal nutrisaun.
(cri)
