Fasilita Povu Ezerse Nia Direitu, MTK Sei Fasilita Transporte

ERMERA, STLNEWS.co – Sura deit ona loron, povu idak-idak sei fila ba nia munisipiu hodi ezerse sira nia direitu, tanba nee Ministeriu Transporte Telekomunikasaun (MTK) sei fasilita roo ba povu Oekusi ho Atauro, laos ba munisipiu rua nee deit, maibe bele mos munisipiu seluk.

“Liga ho eleisaun neebe besik daudaun ona, ami sei fasilita transporte ba povu Oekusi no Atauro, nomos munisipiu seluk neebe presiza transporte atu ba munisipiu hodi tuir votasaun, apoiu neebe MTK halo laos haree ba hau nia ema husi partidu, maibe ita tenki apoiu povu enjeral, oinsa sira bele ezerse sira nia direitu ba ema neebe nia hakarak hili,” lia hirak nee fo sai husi Ministru Transporte Komunikasaun (MTK), Jose Agostinho ba STL iha Munisipiu Ermera, Kapital Gleno, Segunda nee (15/05/2023).

Nia afirma, konaba transporte atu fasilita povu ba ezerse nia direitu iha idak-idak nia munisipiu, nee laiha problema, no povu Oekusi ho Atauro, operasaun Maritima lao diak hela, laiha problema nomos sira seluk neebe atu ba munisipiu transporte laiha, bele hatama karta ruma ba iha ministeriu hodi prepara transporte, no apoiu nee sei ba povu enjeral, laos ba ema husi partidu nian.

Iha parte seluk, reprezentante povu iha uma fukun Parlamentu Nasional, Deputada Lidia Norberta mos husu ba governu atu fasilita transporte ba povu hodi ba tuir votasaun iha idak-idak nia munisipiu.

“Iha eleisaun neebe liu tiha ona ba nee, governu fasilita transporte ba ita nia povu sira atu ba tuir eleisaun iha foho, liu-liu sira neebe kartaun eleitoral munisipiu, ho meus fasilitasaun nee bele ajuda povu ezerse nia direitu ba ema neebe sira hakarak hili ba,” dehan deputada nee.

Nunee mos Deputadu Domingos Carvalho (Dokar) hateten, eleisaun tinan ida nee la hanesan ho sira neebe akontese liu ba, tanba nee husu ba governu atu fasilita transporte ba povu hodi ba tuir vota iha idak-idak nia munisipiu.

(mad)

LEAVE A REPLY

Please enter your comment!
Please enter your name here