DILI, STLNEWS.co – Feto iha abilidade no vontade atu kandidata aan sai nudar Xefi Suku, hodi kontribui ba dezenvolvimentu iha rai laran.
Deputada Bankada CNRT, Veneranda Lemos dehan, hakarak enkoraja feto maluk sira neebe agora daudaun halo hela preparasaun atu kandidata aan ba Xefi Suku.
“Hau bele dehan, feto iha abilidade no hahu ona iha vontade atu sai hanesan Xefi Suku, Xefi Aldeia ou aas hanesan iha Prezidente Autoridade hodi kontribui ba dezenvolvimentu,” dehan nia liu husi plenaria iha PN, Tersa (19/09/2023).
Nia hatete, haree ba pasadu eleisaun iha tinan 2004-2005 feto nia partisipasaun atu kompete iha eleisaun suku nee nain 7 deit, konaba persentajen karik 0,72 husi 442 sukus.
Nia tenik, maibe neineik ba beibeik aumenta, feto iha korajen atu kandidata aan ba iha Xefi Suku nudar autoridade lokal hodi kontribui ba dezenvolvimentu.
Nia afirma, iha 2009 husi prosesu eleisaun ba suku feto iha 2% ba numeru numinal ema iha nain 12 mak kompete husi total suku 442 nee.
Nia sublina, maibe too iha 2016 ninia persentajen komesa sae ba 5%, ida nee bele dehan katak, husi servisu hamutuk ho SEI ho Sisiedade Sivil nomos ho porgrama ida HAU PRONTU 100 %, neebe fo espasu boot tebes ba maluk feto sira atu kandidatu sira nia aan ho preparasaun neebe diak liu tan.
(dom)
