DILI, STLNEWS.co – Lei garante feto ho mane iha direitu no obrigasaun hanesan atu partisipa iha kualker atividade, tanba nee feto labele tauk hodi kompete iha prosesu dezenvolvimentu nasional.
Lia hirak nee hatoo husi Deputada Cedelizia Faria dos Santos husi Partidu CNRT, hanesan Presidente Komisaun ba STL iha Parlamentu Nasional, Tersa (11/07/2023).
Nia hatete, feto presiza inklina aan iha atividade hotu bele hasae konhesimentu, nunee bele kompete ho mane sira iha prosesu dezenvolvimentu nasional.
“Involve mos iha atividade sira neebe pozitivu, sei iha oportunidade ajuda mos ita nia feto maluk sira. Feto sai ativu diak liu tan saida mak presiza halo, labele baruk atu aprende, sei tuir atividade ruma tenki halo ho diak hodi fo rezultadu ida nee diak mos, sai nafatin motivasaun ba feto maluk sira, labele moe atu hatudu ita nia kapasidade, labele tauk atu kompete ho ita nia maluk sira, tanba Maromak halo ita ema nee hanesan deit,” dehan nia.
Nia afirma, nasaun nee presiza mos feto, tanba sensus populasaun 2022 hatudu momos katak, numeru feto ho mane iha diferensia, tanba nee feto mos iha direitu hanesan iha rai doben ida nee.
Iha sorin seluk, reprezentante povu iha uma fukun Parlamentu Nasional, Deputada Bankada PD, Sancha M. Tilman fo mensajen ba feto sira neebe mak agora daudaun partisipa iha vida nasaun nia, importante liu mak haree iha eleisaun parlamentar preve kouta 30%, oinsa mak atu luta ida nee, entaun ida nee fila fali ba idak idak nia aan atu inklina aan iha politika.
“Presiza halo kapasitasaun ba ita nia aan, tanba oportunidade sira nee sempre mai, maibe fila fali ba ita nia aan, oinsa ita bele tama iha fatin neeba. Ita bele hakilar katak hau hakarak ba iha neeba ou hau hakarak hau nia feto maluk nee ba iha neeba, maibe presiza liu mak feto unidade. Segundu presiza iha kapasitasaun ba malu, atu aumenta ita nia konhesimentu,” dehan nia.
(eme)
