Feto Tenki Kontribui Ba Dezenvolvimentu Nasaun

DILI, STLNEWS.co – Feto tenki kontribui ba dezenvolvimentu nasaun, liu husi Aldeia, Suku, Postu Administrativu no Munisipiu, tanba nee tenki barani kandidata aan ba lideransa suku.

Tuir Eis Prezidente Grupu Mulher Parlamentu Nasional (GMPTL), Deputada Lidia Norberta katak, hanesan deputada i hanesan mos eis Prezidente GMPTL, hakarak enkoraja feto maluk sira tenki kontribui ba dezenvolvimentu nasaun liu husi konkore iha eleisaun suku, nee importante tebes.

“Hau dehan importante, tanba iha 400 resin suku iha Timor laran, iha numeru kiik husi feto, maibe sira konsege halo buat diak balu, tanba durante avaliasaun haree sira nia dedikasaunba dezenvolvimentu ka hadia suku nee boot, ida nee faz parte feto kontribui ba dezenvolvimentu nasaun liu husi baze”, katak Eis Prezidente Grupu Mulher Parlamentu Nasional (GMPTL), Deputada Lidia Norberta ba STL, Kinta (21/09/2023) iha PN.

Nia dehan, feto nia papel ba dezenvolvimentu importante, tanba nee husu ba alin, bin, inan sira, labele senti sungken-sungken fali, maibe tenki konkore duni ba iha lideransa suku.

Tuir nia, se feto la partisipa iha eleisaun, too tempu lao haree dezenvolvimentu la lao iha suku laran labele fo sala ba suku, tanba nee hanesan GMPTL enkoraja feto maluk sira atu kandidata aan ba suku hodi sai mos lideransa suku.

Nunee mos Deputada PD Maria Teresa Gusmão hatete, feto nia partisipasaun iha lideransa suku importante tebes.

Tanba nee nudar Deputada husu nafatin mos ba maluk feto sira, atu brani kompete iha eleisaun, i feto sai lideransa denvolvimentu suku sei diak liu.

Entretantu Deputada husi Bankada CNRT Cedelizia Farria katak, sira Deputada nafatin enkoraja feto maluk iha Munisípiu hotu, atu brani kandidata aan ba lideransa suku, tanba feto nia partisipasaun importante, laos hanesan autoridade balu katak kultura lafo dalan ba feto, nee lae.

Tuir Konstituisaun RDTL fo dalan ba feto sira atu sai mos lideransa suku.

(gui)

LEAVE A REPLY

Please enter your comment!
Please enter your name here