DILI, STLNEWS.co – Reprezentante povu iha uma fukun Parlamentu Nasional husu ba governu atu tau matan urjente ba familia sofrimentu dezastre naturais, neebe akontese iha semana kotuk, tanba halakon ema nia vida, estraga estrada, ponte no uma komunidade sira nian balun hetan estraga hotu.
“Hau husu ba governu ida nee atu fo atensaun lalais ba ita nia povu sira neebe mak sofre ba dezastre naturais, neebe akontese iha semana kotuk, tanba ema balun lakon vida, balun uma hetan estragus no estraga mos ponte no estrada kotu iha fatin-fatin, tan nee presiza atensaun husi governu,” kestaun nee fo sai husi Deputadu Alexandrino Nunes liu husi sesaun Plenaria iha Parlamentu Nasional, Segunda nee (10/07/2023).
Nia afirma, governu neebe lidera husi Xanana Gusmao tenki fo atensaun urjente ba povu nia halerik sira nee, tan nee rezolve lalais povu sira neebe sofre ba dezastre naturais, hanesan Deputadu PD hatoo votus solidariedade ba familia sira neebe sofre ba dezastre sira nee.
Tuir nia, familia sira neebe sofre ba dezastre sira nee dala ruma tur laran la hakmate, tanba sira nia sasan hetan estragus hotu husi udan boot neebe akontese, no balun sira nia sasan la salva tanba mota lori hotu, ho problema sira nee, husu governu fo atensaun ho lalais.
Iha fatin hanesan, Deputadu Adolfo Martins hateten, atu rezolve povu nia preokupasaun sira nee mak diak liu bolu governu liu-liu Protesaun Sivil atu mai fo klarifikasaun iha PN, oinsa atu rezolve problema sira neebe povu hasoru iha lorin 4 fulan Julhu, ka semana kotuk nee.
“Ita presiza hatene governu iha planu rezerva ka lae, atu halo metigasaun ba povu sira neebe sofre ba dezastre naturais nee ka lae, tanba dezastre naturais sira nee akontese derepente deit, tanba nee ita tenki antisipa” dehan nia.
Nia afirma, governu prepara aan, antes problema sira hanesan nee akontese iha rai laran, maibe nafatin apresia, tanba governu orienta ona IJE tun ba halo ona normalizasaun iha fatin balun.
(jen)
