OE-SILO, STLNEWS.co – Partidu Frente Revolusionariu de Timor Leste Independente (FRETILIN) bongkar ona knuk CNRT nian iha suku Bobometa, Sub Rejiaun Oe-Silo, Rejiaun RAEOA, tanba povu liu-liu veteranu sira iha suku neeba baruk ona ho CNRT, nunee sira ho konsiensia rasik desidi fila fali ba uma lisan FRETILIN.
Aldeia Quiubiselo, Suku Bobometa, Sub-Rejiaun Oe-Silo, Rejiaun RAEOA hanesan knuk ka baze CNRT nian, maibe ohin (Domingu-red) FRETILIN ba monta ona ninia postu permante iha area neeba, para hametin liu tan servisu partidu nian hodi bele manan eleisaun parlamentar agora, tanba iha neeba FRETILIN nunka manan.
Ho nunee iha CO.Prezidente Troika, Lere Anan Timor ho L7 nia oin Koordenador FRETILIN Sub- Rejiaun Oe-Silo, Domingos Marques promete sira prontu lori vitoria ba FRETILIN iha eleisaun 21 Maiu agora, area sira neebe knuk CNRT nian uluk FRETILIN labele tama agora FRETILIN sobu hotu ona.
“Ami garante katak FRETILIN sei manan iha Sub-Rejiaun Oe-Silo, tanba iha area sira neebe knuk ka baze CNRT nian uluk FRETILIN la bele tama, ohin loron FRETILIN tama sobu ka bongkar hotu ona,”dehan Domingos iha Aldeia Quiubiselo, Suku Bobometa, Sub- Rejiaun Oe-Silo, Rejiaun RAEOA, Domindu nee (07/05/2023).
Iha fatin hanesan, Co. Prezidente Troika, Lere Anan Timor hatete, partidu FRETILIN mak uma lisan Timor nian, tanba nee mak hahoris veteranu, nunee husu ba militante sira labele halo aat ba ema seluk no hakuak ema hotu. Veteranu neebe la envolve iha FRETILIN laiha dignidade.
“Hau husu ba inan aman sira atu vota ba FRETILIN atu dudu oan sira ba tur iha Parlamentu Nasional, governu no seluk tan hodi lidera nasaun nee ba oin,” hatete Lere.
Tanba tuir Lere katak, hahu funu tinan 1975 ema 3.000 mak sai liman kroat, maibe remata funu ema la too atus ida, tanba barak mak mate ho povu iha ailaran hodi liberta patria. Agora patria liberta ona, vota ba FRETILIN para FRETILIN ukun hodi liberta povu husi kiak no mukit.
(car/eme)
