FRETILIN Kestiona Sekjer PN Halo Diskriminasaun Ba Deputadus Ho Funsionariu

DILI, STLNEWS.co – Bankada FRETILIN iha uma fukun Parlamentu Nasional kestiona Sekretariu Jeral (Sekjer) Parlamentu Nasional (PN) halo diskrimasaun ba funsionariu PN no deputadu sira, ho tratamentu la hanesan.

Tuir Deputadu Bankada FRETILIN, Dario Madeira katak, hakarak koalia konaba servisu Sekjer PN nian neebe kria dezentendimentu ka halo atendimentu ida neebe ladun fo satisfasaun ba funsionariu nomos ba deputadu sira durante tinan 5 nia laran.

“Hau husu ba Sekjer PN nian bele haree sasan sira hanesan nee, para funsionariu ho deputadu sira neebe iha PN nee bele hetan tratamentu ida neebe hanesan, hau hakfodak bainhira kuandu hau haree Estatutu Deputadu nian nee iha neebe, iha atendimentu ida ba familia sira neebe mate, mais durante nee ema sira iha kotuk liu ba hetan tiha atendimentu, mais ida iha klaran foin daudaun nee sai fali tiha vitima, depois ida agora mai fali oin nee hasai tiha ona rezolusaun ida para bele responde fali ida nee,” dehan Deputadu Dario Madeira iha PN, Kuarta (31/05/2023).

Nia dehan, funsionariu sira iha PN lubuk ida iha nee, mais laiha atensaun ba iha ida nee, agora durante servisu PN nian liu-liu ba iha servisu Sekjer PN nian atu haree ba asuntu sira hanesan nee ka lae.

“Tanba ema balun hetan tratamentu diak, no ema servisu iha instituisaun hanesan deit, maibe iha diskriminadu nee ba hau nia konsiderasaun tratamentu ida neebe la igual durante iha tinan 5 nia laran, neebe hau deskobre,” tenik nia.

Nia tenik, tanba funsionariu balun iha PN nia familia mate balun hetan apoiu ba iha serimonia funebre ninian, maibe funsionariu balun nia familia mate la hetan fali apoiu nee, too lei nee mai tama iha entrada em vigor sira nia direitu lakon tiha deit.

“Agora mai oin fali ita sira foun, entaun durante tinan 5 nee servisu administrasaun PN mak saida loos, hodi mosu tratamentu ida hanesan nee,” hakotu nia.

Nunee mos Xefi Bankada CNRT, Duarte Nunes hatete, PN nee iha regras maibe regras nee labele partilha, tanba bainhira meza forma iha regras oinsa mak atende susar neebe mak deputadu ka funsionariu sira iha PN hasoru nee iha regras.

“Maibe se karik iha diskriminasaun nee hau hanoin bele, maibe la hatene atu lori ba iha neebe, ba Bankada CNRT ami hatene oinsa mak ami atende, mais agora nivel parlamentu laos kompetensia deputadu sira nian, maibe nee meza mak organiza no meza mak halo regras oinsa mak atende susar neebe mak sira hasoru,” hatete nia.

Entretantu, jornalista STL koko atu halo konfirmasaun ho Sekretariu Jeral Parlamentu Nasional, Adelino Afonco de Jesus, maibe nia rasik lakohi fo komentariu.

(dom)

LEAVE A REPLY

Please enter your comment!
Please enter your name here