FRETILIN Laiha Objesaun Ba Programa IX Governu

DILI, STLNEWS.co – Bankada FRETILIN iha uma fukun Parlamentu Nasional (PN) afirma, sira nia parte laiha objesaun ba programa IX Governu Konstituisional neebe lidera husi Kay-Rala Xanana Gusmao.

Tuir Xefi Bankada FRETILIN, Aniceto Guterres Lopes, hafoin hetan anunsia rezultadu eleisaun lejislativa 2023, lideransa FRETILIN deklara ona publikamente katak, FRETILIN sei sai opozisaun ativa, pozitiva no konstrutiva, sei la dezempenha funsoens governasaun pais nian.

Biar la kaer ukun ka hela iha opozisaun, hanesan FRETILIN hatudu beibeik no prova ona, nudar forsa politika neebe sempre interesadu promove no defende interese estadu, no interese povu tomak-nian.
Entaun ba interese sira nee FRETILIN sempre buka dalan hotu-hotu, neebe posivel atu kontribui ho onestidade, frontalidade no objetividade neebe karakteriza aan iha FRETILIN nia aktu.

“Hanesan hatoo ona iha hau nia intervensaun inisial iha debate, hau hakarak reafirma fali pozisaun Bankada FRETILIN katak, laiha objesaun ba programa IX Governu Konstituisional neebe ohin konklui ona iha debate, apresiasaun signifika, enkuantu opozisaun FRETILIN hakarak kolabora iha implementasaun programa XI Governu Konstitusional, bainhira hetan baze husi intendimentu politika ruma no fo importansia ba estadu no povu ninia ben komum, liu husi estabilidade politika, governativa atu garante pas,” dehan Deputadu Aniceto Guterres liu deklarasaun politika iha PN, Kuarta (19/07/2023).

Nia afirma, pesoal konvida ita hotu iha uma fukun ida nee, mai respeita konfiansa povu nian neebe espresa ona iha urna, iha eleisaun lejislativa 21 Maiu 2023, tanba konfiansa ida ne’e prevalese interese hotu-hotu.

Nia tenik, lori Bankada FRETILIN nia naran, dala ida tan hakarak hatete sai katak, FRETILIN hakarak IX Governu Konstitusional ukun too rohan husi nia mandatu.

Nia sublina, FRETILIN halo kompromisu ida nee, tanba hateke ba lalaok estadu durante tinan hirak ba kotuk, instabilidade politika-governativa folin nee karun tebes, no prejudika interes povu nian ba dezenvolvimentu nasional.

“FRETILIN nia pozisaun no kompromisu hirak nee mak IX Governu Konstitusional neebe xefia husi Primeiru Ministru Kayrala Xanana Gusmao, bele senti segura atu ukun too rohan, tanba nee permite hau ho respeita tomak atu husu ba Primeiru Ministru atu retira pedidu votu de konfiansa,” hakotu nia.

Nunee mos Xefe Bankada PLP, Deputada Maria Angelina Saramento dehan, bazeia ba K-RDTL artigu 79 PN bele aprezenta mosan de rejesaun ka governu bele aprezenta votu konfiansa ba programa governu.

Nia hatete, eleisaun 2023 hatudu momos katak, Partidu CNRT hetan votus maioria husi povu TL, ida nee nudar konfiansa neebe povu fo ba Partidu CNRT atu ukun durante tinan 5, ukun nee nudar alternasia, katak kada tina 5 povu mak desidi atu fo fali fiar ba partidu seluk, laiha partidu ida mak ukun too rohan.

“Ami haree programa IX Governu nian refleta mos prioridade sira neebe balun fo kontinuidade ba programa sira husi governu sesante nian, maibe balun sei la kontinua, balun foun no balun atu halakon,” dehan nia.

Nai afirma, programa setoriais sira leno aan mos ba planu estratejiku dezenvolvimentu nasional 2011-2030, emboras metas barak mak dezatualizadu no rezultadus barak mak la alkansa, no ita asiste katak impase politika mos kontribui hodi la alkansa metas sira iha planu estratejiku dezenvolvimentu nasional. Nunee programa IX Governu nian fo prioridade 6 nudar kompromisu politiku IX Governu nian.

Nia sublina, Bankada PLP agora pozisiona aan hanesan bankada opozisaun, no sei atua ho kritiku maibe konstrutivu, hanesan salienta mos husi lider masimu PLP nian katak, laiha objesaun atu fo apiu ba IX Governu ida nee.

Nia hatutan, nunee mak ho jestu neebe Primeiru Ministru sesante hatudu liu husi ho termu de entrega husi VIII Governu nian servisu ba IX Governu ho profisionalizmu no responsabilidade, hodi hatudu kultura pozitivu katak, ukun too rohan no jestu ikus liu mak entrega ho responsabilidade ba IX Governu, tanba misaun neebe durante tinan 5 ukun.

(dom)

LEAVE A REPLY

Please enter your comment!
Please enter your name here

%d bloggers like this: