Manatutu, STLNEWS.co – Partidu Frente Revolucionária de Timor-Leste Independente (FRETILIN) mak uma lisan povu tomak nia, tanba nee FRETILIN desidi lori naroman ba povu.
Kestaun nee hatoo husi Prezidente Troika atual Sekretariu Jeral Partidu FRETILIN Mari Alkatiri liu husi aprezentasaun bainhira halo mini kampanha iha Postu Administrativu Laklubar, Munisipiu Manatutu, Tersa nee (02/05/2023).
Prezidente Troika Mari hatutan, FRETILIN nia moto lori Naroman ba Povu, tanba tempu naruk tebes mak politika iha Timor Leste ema balun halo lori povu ba nakukun, FRETILIN desidi lori hikas naroman ba povu, atu lori naroman ba povu FRETILIN tenki fila hikas ba nia istoria rasik, FRETILIN mak povu no povu mak FRETILIN.
“FRETILIN sai uma lisan ba povu tomak, uma lisan hotu-hotu iha lia nain, lian nain ita nia barak liu mak fo aan ba mate ona, ohin hau temi sira nia naran, maibe husik hela hau mesak hamriik hanesan lia nain uma lisan boot ida nee,” katak Mari.
SekJer hatete, normal natural tuir natureza nia, tanba nee se mak mai husi FRETILIN sei fila hikas ba FRETILIN, tanba oras nee Tanente Jeneral Lere fila ba nia uma lisan, nomos Cornelio Gama L7 ho nia organizasaun tomak hamutuk ho FRETILIN.
“Ita haree FRETILIN viabiliza governu ida, Primeiru Ministru uluk kombatete boot ida iha FALINTIL hamutuk ho ita laos mai uma lisan ona, maibe nia iha partidu rasik, ohin lia nain koalia ona saida mak governu da-19, ida nee FRETILIN, PLP, KHUNTO hamutuk halo ona ba povu ida nee, sira bele nega dehan la halo buat ida, hau la presiza atu responde ba ida nee, maibe saida mak governu ida nee halo povu bele haree ho matan, povu bele kaer ho liman, povu tomak senti ho fuan ho nia laran tomak, hau la presiza responde ba sira,” katak nia.
Mari hatutan, husi nee ba oin FRETILIN nia dever mak nee, kontinua luku klean iha povu nia leet atu nani hamutuk ho povu loke dalan ba naroman, no naroman ba ema hotu, nee mak FRETILIN nia dever, husi nee ba oin fila hikas ba nia abut mak povu nee duni.
Koordenador masimu Sagrada Familia Cornelio Gama L7 hatutan, Sekretariu Jeral Partidu FRETILIN Mari Alkatiri mak kaer uma lisan FRETILIN no FALINTIL nia, tanba nee presiza respeita nafatin.
“Sekretariu Jeral mak ita nia aman boot, nia mak kaer ita nia uma lisan FALINTIL nia aman mak nee, povu klandestina, kaisa klandestina, Santo Antonio nia aman mak nee ona, partidu nee foin mak mai, tanba nee mak imi tenki respeita,” katak Nia.
L7 haktuir tan katak, FRETILIN mak uma lisan povu maubere nia, no bandeira neebe mak povu kaer nee reprezenta maluk matebian sira nia ruin no raan, tanba nee hamutuk ho Sekretariu Jeral hodi lori bandeira lulik nee ba oin hodi halo dezenvolvimentu ba povu ida nee.
Nunee mos Koordenador Munisipiu Manatutu Luis Oliveira hatutan, oras nee daudaun Laklubar oan sira hatene saida mak sira halo iha 21 Maiu, agora la hanesan ona ho periodu liu ba.
Nia dehan, la presiza koalia saida mak oitavu governu halo, tanba lia nain koalia ona no povu hatene ona saida mak FRETILIN halo ona ba povu.
Nia husu mos ba militante no povu Laklubar oan atu vota ba FRETILIN iha 21 Maiu, nunee FRETILIN manan hadia estrada Laklubar, povu bele asesu hodi lori produtu lokal ba merkadu.
(eme)
