RAEOA, STLNEWS.co – Partidu FRETILIN ukun sei harii infraestrutura integradu kualidade no harii sistema irigasaun nomos ponte, nunee povu bele halo natar no toos.
Kestaun nee hatoo husi Sekretariu Jeral Partidu FRETILIN Mari Alkatiri liu husi nia intervensaun iha mini kampanha neebe halao iha Suku Woe Nunu Sub- Rejiaun Nitibe Rejiaun Administrativu Espesial Oekusi (RAEOA), Domingu (07/05/2023).
“Harii infraestrutura integradu kualidade, infraestrutura kualidade signifika sei harii barajen ida iha sistema irigasaun, sei harii mos iha ponte ida nee para sistema irigasaun funsiona, nunee povu sira halo sira nia natar no toos komesa iha produsaun sae, bele tempu bailoron ka tempu udan uza ponte lori sira nia produtu ba merkadu, nee mak dehan harii infraestrutura integradu kualidade, nee mak hahu iha Oekusi iha irigasaun Tono no Ponte Tono nia,” dehan Sekjer Mari.
SEKJER hatutan infraestrutura Integradu no kualidade hahu husi Ponte Tono no sei halo mos iha fatin hotu, nunee iha Oekusi hahu husi Ponte Tono too iha Citrana mos iha mota lubuk ida maibe oinsa mak kontrola mota sira nee ho Ponte diak nunee satan bee labele halai ba sorin.
“Infraestrutura kualidade atu povu bele aproveita sira nia rai bokur, nunee aumenta produsaun iha produtividade, ita hahu tiha nee depois ba fatin seluk, dala barak ita halo tiha irigasaun maibe tempu udan ema labele liu nafatin husi mota, ho irigasaun nee objetivu mak saida, promove produtu atu halo produsaun ou aumenta produsaun, no produsaun so bele iha valor para faan hare, batar no produtu sira seluk bainhira lori too iha merkadu, se bainhira too merkadu presiza iha ponte no estrada,” katak nia.
Nia hatutan, se laiha mota laiha estrada, komunidade sira labele lori sira nia produtu husi area rurais ba nasionais, tanba nee mak presiza harii infrastrutura integradu ho kualidade.
Nunee mos Lideransa Troika Lere Anan Timur hatutan, Partidu FRETILIN mak uma lisan Timor nia no uma lisan ba partidu hotu hotu, no agora FRETILIN iha programa hodi haree ba edukasaun, saude, infranstrutura no seluk tan, tanba nee atu realiza planu no programa sira nee povu tenki vota ba numeru 11, nunee lori povu husi nakukun ba naroman.
Prinsipiu FRETILIN nia uluk mak luta hodi Timor Leste hetan ukun rasik aan, ohin loron hetan indepedensia ona hakarak kore povu husi kiak no mukit.
Lere hatete, partidu hotu iha planu no programa neebe mak hanesan deit, ezemplu tun kampanha koalia programa no planu mos hanesan ho Partidu FRETILIN nia, maibe ema neebe atu halo la hanesan.
(eme/car)
