DILI, STLNEWS.co – Governu seidauk halao pagamentu ba subsidiu idiozus, maski tama ona ba fulan Agustu, tanba nee husu governu aselera prosesu pagamentu, ba oin presiza hasae montante.
Lia hirak nee hatoo husi Visi Sekretaria Parlamentu Nasional (PN), Maria Teresa Gusmão katak, governu foun sei haree ba programa no lei organiku, maski aprova ona, depois mak sira sei prosesu subsidiu, maibe tuir los subsidiu idozus la presiza simu too fulan 6, maibe kada fulan bele simu ona.
“Ami sujere fulan 1 ka 2 bele aselera ona, subisidiu idozus hasae mos osan, nunee sira presiza buat ruma sira bele sosa, fulan 6 mak simu, tarde tan, ida nee distansia fulan dook liu”, katak Visi Sekretaria PN, Maria Teresa Gusmão ba STL via telefone iha Dili, Sesta (04/08/2023).
Nia kestiona, kada fulan simu US$ 50 nee susar, tanba nee presiza hasae tan sira nia osan, nunee simu kada fulan.
Tuir nia, PD iha kampanha eleitoral hasae osan idozus ba US$ 100, maibe PD la manan maioria. Maibe mos PD promete iha debate OJE, PD sei husu governu liu husi Ministeriu Solidaridade Sosial atu hasae tan valor no simu kada fulan.
Nunee mos idoza Hermina do Carmo Oliveira husi Munisipiu Dili hatete, subsidiu idozus too agora fulan Agustu tiha ona, maibe seidauk simu.
Tanba nee husu ba IX Governu neebe lidera husi Xanana Gusmão liu husi Ministeriu Solidaridade Sosial, atu aselera sira nia osan.
“Governu agora forma husi CNRT ho PD, no iha kampanha sira promete atu hasae ami nia osan, neebe ami husu ba hasae i ami bele simu kada fulan”, katak idoza Hermina.
Nia hatete, bainhira simu kada fulan 6 diak, maibe fulan 6 kleur liu, se karik bele kada fulan, maibe montante osan nee bele aumenta tan.
(gui)
