DILI, STLNEWS.co – Ministru Edukasaun Juventude no Desportu (MEJD), Armindo Maia hatete, antes fulan Julhu remata, tama fulan Agostu bele rezolve problema profesores kontratadu.
“Fulan Setembru iha Parlamentu Nasional hau hatete, ministeriu sei lori asuntu ida nee ba iha Konselhu Ministru, ami esforsa katak, antes fulan Julhu remata desizaun final sei iha, sekarik ministru mak desidi oras nee ami rezolve tiha ona, ami la presiza hein buat sira iha nee ba,” dehan MEJD Armindo ba jornalista iha salaun VIP MEJD Vila-Verde, Dili, Segunda nee (25/07/2022).
Nia akresenta, foin daudaun ba iha Parlamentu Nasional koalia ona asuntu ida nee, oinsa mak atu haree no rezolve problema profesores kontratadu sira nian neebe durante nee publiku kestiona beibeik asuntu ida nee.
Iha sorin seluk, Diretor Jeral Administrasaun, Management no Finansas MEJD, Antoninho Pires hatete, kompromisu MEJD nian, tinan ida nee atu hadia estatutu profesores kontratadu 4.900 ital, nee atu hadia sira nian estatutu.
“Ba profesores volontariu ami halo verifikasaun ida ba iha teritoriu laran tomak, ami halo verifikasaun ba eskola 500 resin ho profesores volontariu sira nian naran mai, ami hetan ona lista nee 2.790 ital, husi numeru nee ami atu halo prosesu hodi halo rekrutamentu kontratu ba ami nian vagas neebe iha,” tenik nia.
(jac)
