DILI, STLNEWS.co – Hahu husi primeiru governu mai too agora, gasta ona osan barak kuaze bilhaun US$ 15.5 nia progresu mak estrada husi nasional ba munisipiu sira nee lao diak, hanesan Dili ba Baukau, Jalan Tol iha Kovalima, projetu portu, nomos projetu sira neebe lao ona iha RAEOA-ZEESM.
Tuir Deputadu Bankada CNRT, Natalino dos Santos katak, dezenvolvimentu iha rai laran atu lao diak mak governu tenki gasta oson boot, karik la gasta osan oinsa dezenvolvimentu iha rai laran atu sai furak hanesan ho nasaun sira seluk nian.
“Hau hanoin dadus husi Sosiedade Sivil dehan gasta ona bilhaun US$ 15.5 nee los duni, maibe sira mos tenki halo balansu ruma, haree setor infraestrutura iha rai laran lao duni ka lae, karik abansa daudaun ona mak, nee rezultadu husi osan neebe ita gasta ona,” kestaun nee fo sai husi Deputadu CNRT, Natalino dos Santos ba STL iha Parlamentu Nasional, Segunda (17/07/2023).
Nia afirma, iha V Governu la halo dezenvolvimentu iha rai laran, tanba nee governu ida nee mai atu halo mudansa, no atu dehan deit katak, husi total osan sira neebe gasta ona nee, hatudu duni benefisiu ba povu ida nee, maski seidauk masimu, tan nee governu tenta nafatin hodi eleva nafatin dezenvolvimentu lori moris diak ba povu ida nee.
Tuir nia katak, dala ruma sosiedade sivil sira kritika governu dehan gasta osan boot, maibe la dezenvolve setor produtuvu sira hodi kontribui reseitas ba kofre estadu no redus dependensia ba fundu mina no gas nian, tanba nee governu neebe lideradu husi Partidu CNRT ho PD sei buka meus atu investe iha setor sira nee, tanba partidu rua nee hakarak halo mudansa.
(mad)
