Gasta Osan Barak, Hadia Povu Nia Moris

DILI, STLNEWS.co – Timor Leste (TL) komemora ona Proklamasaun Independensia 28 Novembru ba dala 48. Tinan barak ona gasta osan mos barak, tanba nee politika nain sira tenki hanoin oinsa hadia povu nia moris, hodi povu senti ukun rasik aan.

Tuir Xefi Bankada CNRT, Duarte Nunes katak, TL komemora tinan 48 nee lori tempu naruk, maibe durante tinan 24 nia laran luta hodi defende independensia. Neebe durante tinan 20 resin mak hahu atu halo dezenvolvimetu ba rai ida nee.

“Durante tinan 20 resin, ita haree povu hotu moris diak, neebe situasaun nee presiza hanoin buat ruma neebe seidauk loos. Tuir hau nia haree, tanba ita gasta osan barak, i rekursu umanus mos iha ona, agora tama ona faze politika, sira tenki hanoin atu dezenvolve rai no povu, laos ba interese grupu nian”, katak Xefi Bankada CNRT Duarte Nunes ba STL, Kuarta (29/11/2023) iha PN.

Nia dehan, atu dezenvolve nasaun no povu, programa se nian deit mak lao ona, maski politika idak-idak, maibe objetivu atu hadia povu nia moris, neebe se mak ukun seluk sae fali tenki hatutan, nunee bele atinje politika hadia povu nia moris.

“Se programa sira lao ona, depois seluk sae ba ukun fali halakon, hodi halo seluk, ida nee mak impaktu ba too ohin loron povu balu seidauk senti ukun rasik aan”, tenik nia.

Nia katak, konaba desentralizasaun nee programa ida tau ona iha Planu Dezenvolvimentu Nasional (PDN), bele dehan tanba saida mak durante nee implementa ikus mai la implementa, ida nee mos tanba dala ruma halo lei mos dala ruma dada malu.

Nunee mos akademiku hanesan mos Prezidente Ezekutivu Fundasaun Cristal, Agustinho dos Santos Gonsalves katak, tenki halo ona desentraliza, governu iha ona planu, ba futuru halo eleisaun ba prezidente munisipiais ka administrador munisipiais, para osan hotu aloka iha neeba, nunee mos bele halo asembleia munisipal, nunee bele halo regras, tanba Timor potensia barak ba produtu.

“Timor nee ema hotu mai konsentra iha Dili, entaun ita nia rikusoin barak mak abandona iha suku no aldeia deit, tanba hela deit ferik ho katuas i joven sira mos ba hotu rai liur”, katak nia.

Nia hatete, IX Governu, PN no hotu-hotu hamutuk oinsa kontribui ba dezenvolvimentu povu no nasaun, husi universidade sira prontu atu alo peskiza ba setor ekonomiku sira, depois hamutuk ho komersiu ka hamutuk ho emprezariu sira, nunee bele halo planu ba dezenvolvimentu povu no nasaun.

(gui)

LEAVE A REPLY

Please enter your comment!
Please enter your name here