DILI, STLNEWS.co – IX Governu liu husi Primeiru Ministru Kay Rala Xanana Gusmão, agradese reprezentante Santa-Se iha Timor-Leste (TL), neebe hakarak hadia kualidade ensinu iha TL.
Liafuan agradese nee hatoo husi Primeiru Ministru Kay Rala Xanana Gusmão katak, Monsignor Marco Sprizzi, nudar reprezentante Santa-Se iha Timor, interesantes tebes, tanba uluk monsignor iha Korea, Universidade Katolika Korea mos dezempenha papel importante, sai hanesan ezemplu universidade Katolika, katak sai ema neebe matenek.
Neebe Santa-Se mos interesante tebes atu hadia kualidade ensinu iha Timor.
“IX Governu hakarak hadia kualidade ensinu, tanba nee agradese no obrigadu ba monsignor, ba interese atu aumenta kualidade ensinu no universidade katoliku, sai universidade neebe bele kria lideransa ba futuru”, katak Primeiru Ministru Kay Rala Xanana Gusmão, ba Jornalista sira iha Aeroportu Internasional Nicolao Lobato, molok aranka ba Bali, Indonezia, Tersa (10/10/2023).
Entretantu, Bispu Dioseze Maliana, Noberto do Amaral rekonhese problema edukasaun iha Timor-Leste sei hasoru dezafiu oin-oin no parte igreja rasik sei tuur hamutuk hodi hadia no aposta makaas iha kualidade edukasaun.
“Ba preokupasaun PM Xanana, Universidade Katolika iha komplikasaun boot igreja nia laran. Nee duni hau husu bele komprende oituan, tanba ida nee ami sei rezolve no haree ho diak,” dehan bispu liu husi komunikadu neebe STL asesu husi Gabinete PM.
Dom Noberto hatete, Igreja Katolika sei halo regra mos ba eskola hotu, Igreja Katolika mantein dixiplina no regras hotu hodi motiva estudante sira bele aprende no estuda hodi sai ema ida edukativu tuir igreja nia hanorin.
(gui)
