DILI,STLNEWS.co – Governu Da-8 Konstituisional agora iha situasaun dilematika, tanba taxa ne’ebe hasa’e hanesan asukara bebidas no masmidar mak influensia presu sasan nessesidade bazika sira seluk mos aumenta kada loron.
“VIII Governu iha situasaun dilematika, tanba hasa’e taxa parte ida husi politika reforma fiskal hodi hetan reseitas ba estadu, maibe taxa ne’e ba asukara bebidas no masmidar tanba prejudika saude publiku, mais nia implikasaun husi hasa’e taxa ne’e influensia presu sasan nessesidade bazika sira seluk mos aumenta kada loron,” dehan observador politika UNTL, Felisberto de Carvalho ba STL iha nia knaar fatin, (03/05/2023).
Nia afirma, iha parte ida governu la hasa’e taxa, signifika laiha reseitas domestika ne’ebe natoon hodi finansia dezemvolmentu.
“Tanba ita sei depende deit ba Fundu Minarai, kuandu Fundu Minarai laiha ona ita laiha reseitas seluk hodi finansia dezemvolvimentu, entaun kondisaun ne’e lori ita ba iha situasaun ida ema hanaran FISCAL CLIFF ou rai naruk fiscal,” hatete nia.
Nia sublina, se estadu hasoru Fiscal CLIFF mak sei iha redusaun ba gastus publiku nesesariu sira hanesan edukasaun, saude i agrikultura.
Nia hatutan, entaun ho kondisaun ne’e mak bele lori ita nia nasaun ba estadu falhadu, tanba laiha ona orsamentu hodi finansia despezas publik sira, bele hasa’e taxa maibe gradualmente atu labele implika ba sasan nesesidade bazika sira.
(dom/nat)
