DILI, STLNEWS.co – Ministru Prezidensia Konselhu Ministru (MPKM), Fidelis Magalhães hateten, governu mantein kandidatu Jose Ximenes nudar Komisariu Komisaun Anti Korupsaun (KAK).
Fidelis hatete, kandidatu KAK neebe governu aprezenta ba Parlamentu Nasional, too oras nee seidauk iha desizaun, tanba bankada oposizaun la aseita ho kandidatu neebe governu propoin.
“Neebe ita tenki hein Parlamentu Nasional, tanba parte governu nian halo tiha ona nia kompetensia tuir lei haruka,” dehan Ministru Prezidensia Konselhu Ministru, Fidelis Leite Magalhães ba jornalista sira iha edifisiu Ministeriu Finansas Aitarak-Laran, Sesta nee (17/03/2023).
Tuir lista neebe governu aprezenta ba Parlamentu Nasional, bainhira avansa ona ba votasaun, mak deputadu sira maioria vota kontra kandidatu governu nian, governu tenki nomeia fali kandidatu foun.
“Hatoo tiha ona katak, se konkorda aprova, se la konkorda vota kontra, se desizaun ida nee mak determina governu nian hakat sira tuir mai,” dehan nia.
Aleinde nee, Fidelis Leite Magalhães lakohi komenta konaba bankada oposizaun sira neebe la konkorda ho kandidatu husi governu neebe nomeia Jose Ximenes nudar Komisariu KAK.
Governante nee fundamenta liu tan katak, Jose Ximenes antes nee okupa kargu hanesan Prokurador Jeral Republika dala rua, nunee nia hanesan figura ida neebe preparadu liu atu okupa kargu nudar Komisariu KAK.
“Nia susesu, tanba durante okupa kargu hanesan Prokurador Jeral Republika periodu rua no nia figura ida neebe iha kareira naruk iha setor justisa, iha susesu boot,” dehan nia.
(alb)
