DILI, STLNEWS.co – Ministra Negosiu Estranjeiru no Kooperasaun (MNEK), Adaljiza Magno hatete, governu tau fiar ba lider nasional Kay Rala Xanana Gusmão atu halo negosiasaun konaba fronteira terestre no maritima ho Governu Indonezia.
Adaljiza hatete, prosesu negosiasaun antes nee seidauk bele lao, tanba Governu Indonezia preokupa hela ho pandemia Covid-19 no enkontru nasaun G20 inklui ASEAN nian.
Tanba nee, nasaun rua nee seidauk tur hamutuk atu halo negosiasaun durante tinan tolu nia laran, maibe kuandu situasaun normal ona, negosiasaun sei iha konkluzaun.
“Portantu, negosiasaun presiza tempu, ita hotu-hotu hakarak lais, maibe ita fo ona konfiansa ba ema ida, ita husik nia halo negosiasaun nee,” dehan MNEK, Adaljiza Magno ba jornalista sira iha Palasiu Governu, Tersa nee (14/03/2023).
Governante nee hatutan, negosiasaun fronteira terestre no maritima nee dala ruma sei lori tempu too tinan 20 ou 30, tanba nasaun membru ASEAN hanesan Malazia no Singapura too agora seidauk iha akordu, tanba hadau malu hela ilha kiik.
“Governu Indonezia too agora sira seidauk tur hamutuk ho ita nia delegasaun, sira mos hakarak negosiasaun nee lalais, problema dala ruma tempu, mais imi hakarak hatene detalhu, imi tenki husu ba senhor Xanana, tanba nia mak dezignadu ba halo negosiasaun, hau lae, tanba hau ba lobi deit,” dehan Adaljiza.
Entretantu, antes nee iha loron 23/11/2018 governu liu husi reuniaun Konselhu Ministru estraordinariu, neebe diriji husi Primeiru-Ministru Taur Matan Ruak, nomeia antigu Prezidente Republika no atual Xefi Negosiador Prinsipal Kay Rala Xanana Gusmão nudar reprezentante espesial Governu Timor-Leste nian, atu reprezenta Estadu iha negosiasaun fronteira ho Republika Indonezia, no indika Roberto Sarmento Oliveira Soares nudar Xefi Ekipa Tekniku ba negosiasaun.
(alb)
