Governu Foun Presiza Tau Ema Matenek

DILI, STLNEWS.co – Prezidente Republika Jose Ramos Horta hatete, governu foun presiza tau ema neebe matenek, hodi dezenvolve rai nee ba oin.

Prezidente Republika hatoo kestaun nee ba jornalista sira, bainhira remata halo enkontru ho ekipa Para Olimpiku iha Palasiu Prezidente Bairru Pite, Kinta (25/05/2023).

“Klaru presiza tau ema matenek, iha tinan 20 nia laran ona laiha ema barak ho esperiensia, esperiensia governasaun i estudus, tantu haree didiak mak tau ema neebe polifikasaun akademiku forti, maibe laos kualifika akademika deit, tenke iha esperiensia, ema ida bele mestradu, doutoradu, maibe esperiensia pratika governasaun laiha, nia sei koalia deit maibe la hatene lidera,” katak PR.

Horta hatete, presiza iha kualifikasaun akademika, maibe iha mos esperiensia pratika no iha kapasidade atu lidera.

“Lideransa laos boot nasional deit, ninistru nee tenki lider ida iha nia setor nee, nia tenki lidera,” katak PR Horta.

Nunee mos Prezidente Partidu Demokratiku Mariano Assanami Sabino hatutan, ema neebe mak kaer membru governu presiza ema neebe matenek.

“Hau hanoin membru governu tenki iha buat rua, meritu la sukat deit husi universidade, mestradu, meritu, katak iha kapasidade no iha konhesimentu klean, neebe ita sempre aposta ba estadu ida neebe bele hodi estadu nee lao ba oin,” katak nia.

Nia hatutan, bainhira partidu vensedor iha ona, koalia koligasaun mak baibain ema koalia, primeiru plataforma koalia konaba kompromisu, depois mak koalia konaba buat seluk tan.

(eme)

LEAVE A REPLY

Please enter your comment!
Please enter your name here