DILI, STLNEWS.co – IX Governu hasai rezolusaun hodi suspende atividade Grupu Arte Marsiais (GAM), tanba relasiona ho akontese insidente violensia neebe ligadu ho partika Arte Marsiais.
Tuir Komunikadu neebe STL asesu Sabadu nee (11/11/2023) katak, Polísia Nasionál Timor-Leste (PNTL) sei realiza operasaun espesiál ba prevensaun kriminál iha área jeográfika iha ne’ebé akontese insidente violénsia relasionadu ho prátika artes marsiais, tuir artigu 33.º Lei n.º 5/2017, loron 19 fulan Abril, PNTL sei realiza mós operasaun prevensaun kriminál sira seluk ne’ebé presiza atu prevene no kontrola atu ilísitu sira relasionadu ho prátika artes marsiais, liu-liu iha Díli no iha área sira seluk nasaun nian, iha ne’ebé iha risku boot liu atu akontese insidente sira.
“Ho rezolusaun governu nee, Ministru Interior no Ministru Defeza sei hetan instrusaun atu halo dilijénsias (foti medidas) nebé presiza hodi identifika ajentes husi forsa polísia no forsa militár neebe envolve iha organizasaun ka prátika artes marsiais. Sira sei promove mos asoins sensibilizasaun no formasaun ba agentes polísia no militár sira kona ba polítika toleránsia zero husi governu ba sira nia partisipasaun iha organizasaun artes marsiais”, haktuir iha komunikadu.
Kontinua ba pajina 2
Governu fó instrusaun funsionáriu, ajente administrasaun públika no pessoal kontratadu hotu-hotu atu kumpri Kódigu Étika tomak, liu-liu konaba envolvimentu iha prátika ilísita ne’ebé relasiona ho artes marsiais no apela ba sidadaun no lideransa komunitária hotu-hotu atu kolabora ho autoridade seguransa sira, hodi identifika prátika ilísita artes marciais nian.
Ministru Juventude, Desportu, Arte no Kultura hetan responsabilidade hodi promove inisiativa sira ne’ebé presiza atu sensibiliza populasaun, liu-liu foin-sa’e konaba importánsia atu pratika desportu ho saudavel. Ministru Juventude, Desportu, Arte no Kultura mos iha responsabilidade atu adota atus ne’ebé presiza hodi implementa no kumpri rezolusaun ida ne’e ho forma integrál liu-liu konaba suspensaun ba atividade no enseramentu (taka) sentru, klubu no eskola sira ne’ebé destina ba prátika artes marsiais.
(gui)
