DILI,STLNEWS.co – Reprezentante povu iha uma fukun Parlamentu Nasional (PN) afirma, objetivu IX Governu hatun ona taxa importasaun husi 5% ba 2,5%, hodi normaliza presu sasan, maibe realidade sasan folin kontinua sae iha merkadu.
Deputadu Bankada FRETILIN, Dario Maderia hatete, hakarak koalia hanesan esperensia ida uluk OJE 2023 kuandu hahu debate iha PN, bainhira negosiante sira rona dehan hasae taxa, folin sasan hotu-hotu iha kios ka loja sira nee sae hotu dala ida iha momentu nee kedas, maski OJE PR seidauk promulga.
“Maibe agora nee oin seluk fali, debate OR lao tiha ona kuaze atu tama ona semana 1, mais sasan folin nunka ida tun, laiha impaktu ida ho debate OR, maski ita hatun ona taxa husi 5% tun ba 2,5% nia impaktu laiha liu,” dehan nia iha PN, Tersa (29/08/2023).
Nia tenik, hakarak husu governu nia resposta nee saida iha hatun taxa nee, objetivu hatun taxa para asegura komunidade ka povu kiik sira neebe mak durante iha ninia esperansa ba governu katak, hatun taxa nee rezolve ona sira nia problema ho folin sasan neebe karun iha merkadu.
Nia sublina, maibe too ohin loron sasan folin kontinua sae ba beibeik nafatin, uluk foos saka ida US$ 17, maibe agora sae tiha ona ba US$ 18 ate too US$ 20.
(dom)
