DILI, STLNEWS.co – Governu Timor Leste liu husi Servisu Apoiu Sosiedade Civil no Auditoriu Sosial (SASCAS) ho parseiru estratejiku, sosiedade sivil realiza serimonia asina memordum de entendimentu, no halo mos lansamentu website SASCAS.
Iha biban nee, Diretor Ezekutivu Servisu Apoiu Sosiedade Civil no Auditoriu Sosial (SASCAS), Edvin Soares ba jornalista sira iha Salaun CNE, Segunda (28/08/2023) hatete, SASCAS realiza serimonia asina akordu ba subvensaun publiku ho organizasaun sosiedade sivil, aleinde nee halo mos lansamentu ba website SASCAS ho objetivu prinsipal atu dizitaliza informasaun servisu publiku nomos hodi responde ba programa governu konaba governu eletroniku iha futuru.
“Tanba ita hotu hatene katak, ita tama ona iha era dizitalizasaun, no governu mos iha politika ida iha eletronika dizitalizasaun no SASCAS mos hahu konsolida aan no prepara oinsa atu responde ba politika governu nia tuir mai,” dehan Diretor SASCAS.
Diretor hatutan, ho nunee iha futuru la presiza ona manual haruka informasaun ba SASCAS, no sira mos halo resposta ba, maibe bele tama iha link website bele aktualiza ona informasaun, no aktualiza ona sa politika mak SASCAS iha, no aktualiza ona mata dalan ba subvensaun publiku, no aktualiza mos atividade hotu neebe mak apoiu husi SASCAS, ida nee mak nia objetivu.
Diretor dehan, SASCAS sei update loron-loron ba servisu SASCAS nia iha teritoriu Timor laran tomak liga ba parseiru, governu no sosiedade sivil.
Nunee mos Visi Primeiru Ministru, Mariano Asanami Sabino hatutan, lansa website ida para halo komunikasaun diak liu, no governu hatene katak, governu ida nee dezde inisiu kedas iha komitmentu atu sosiedade sivil tenki forti siblizasaun tenki lao, edukasaun sivika tenki lao reforsa liu tan organizasaun para bele sai forti.
“Tanba ita hatene katak, governu, sosiedade sivil, setor privadu nee elementu tolu neebe mak importante ba iha konstrusaun estadu,” dehan Visi Primeiru Ministru.
Iha biban nee, Visi PM hatutan, sosiedade sivil nia papel importante iha konstrusaun estadu, sosiedade sivil, setor privadu, governu, nee setor parseria ba malu, depedente ba malu, koopera malu liu liu ba konstrusaun estadu.
(eme/don)
