DILI, STLNEWS.co – Primeiru Ministru eleitu Governu Kamboja promete ona sei kontinua fo tan bolsu estudu ba estudante Timor oan sira neebe iha prestasaun diak, maibe laiha kbiit atu kontinua sira nia estudu ba iha nivel universitariu.
Visi Primeiru Ministru, Ministru Koordenador ba Assuntu Ekonomiku, Ministru Turizmu no Ambiente, Francisco Kalbuadi Lay hateten, nia prezensa iha Kapital Phnom Penh, tanba simu no hetan konvite husi Primeiru Ministru, Hun Manet neebe assumi kargu nee dezde iha loron 01 Agostu 2023.
“Hau simu konvite husi Hun Manet neebe foin eleitu nudar Primeiru Ministru Kamboja nian. Oportunidade nee iha dadersan hau hasoru ona Ministru Turizmu inklui Ministra Komersiu, no ohin lororaik nee mak hasoru malu ho Primeiru Ministru Hun Manet, no ami koalia buat lubuk ida,” hateten Visi Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Francisco Kalbuadi Lay, liu husi nota komunikadu neebe STL asesu husi media Gabinete Visi Primeiru Ministru, Segunda kalan (28/08/2023).
Visi Primeiru Ministru nee esplika, husi sorumutu hirak nee nia konvida governante sira husi governasaun Hun Manet atu bele vizita Timor-Leste, hodi esplora potensialidade iha area ekonomia, komersiu, negosiu no industria nian.
“Governante hirak nee konkorda ona balun sei vizita ita nia rain ho sira nia setor privadu sira atu bele esplora ita nia potensilidade sira molok estabelese akordu bilateral ruma iha área ekonomia no negosiu,” nia esplika.
Iha parte sorumutu ho Primeiru-Ministru Hun Manet, vizita Primeiru Ministru nee esplika, governu foun Kamboja sei kontinua nafatin tulun Timor-Leste iha area oin-oin too Timor-Leste sai ful member ba ASEAN.
“Primeiru Ministru Kamboja mos hateten ona sei kontinua fo bolsu estudu ba Timor oan sira atu mai kontinua sira nia estudu iha nivel superior iha nee,” nia esplika.
Governante nee hahu vizita Kamboja dala barak ona, no hahu vizita nasaun nee dezde iha tinan 1994 too ohin loron.
Nia konsidera relasaun bilateral entre rai rua nee komesa metin ba daudaun ona, tanba iha lideransa ambodia nian iha ASEAN mak halo Timor-Leste sai observador permanente iha organizasaun rejional nee, no oras nee kontinua apoiu Timor-Leste iha setor oin-oin too sai full member.
Nia esplika, durante pandemia Covid-19 nasaun barak iha mundu inklui nasaun membru ASEAN sira hetan sofrementu makaas konaba ekonomia tun, maibe Kamboja konsege hakat liu situasaun nee ho diak, tanba hafoin pandemia Covid-19 nasaun nee hetan rendimentu maka’as iha setor turizmu.
“Hafoin pandemia Covid-19, turista sira neebe vizita Kamboja kada tinan kuaze milhaun 13. Ida nee mak ita tenki aproveita inklui mos ita tenki kria solidaridade, fiar no konfiansa neebe kria kleur ona, hahu eis Primeiru Ministru Hun Sen ho maun boot Primeiru Ministru, Kay Rala Xanana Gusmão konhese malu iha tinan 2002 too ohin loron, hau mai atu kontinua deit, tanba ohin loron nia oan mak sai Primeiru Ministru hanesan mos hau nia kolega rasik. Hau mos hanesan konvidadu dahuluk mai vizita Kamboja hafoin simu knaar foun nee,” nia esplika.
Iha fatin hanesan, embaixador Timor-Leste ba Kamboja, Hermenegildo Kupa hateten, prezensa Visi Primeiru Ministru, Ministru Koordenador ba Assuntu Ekonomiku, Ministru Turizmu no Ambiente, Francisco Kalbuadi Lay iha Phnom Penh nee pozitivu tebes, tanba Visi Primeiru Ministru nee iha relasaun diak tebes ho Primeiru Ministru foun Kamboja nian, no mis konhese diak rai nee kleur tiha ona.
“Pozitivu ida mak Kamboja kontinua fo tan bolsu estudu bai ta nia estudante Timor oan sira atu mai eskola iha nee,” esplika Embaixador Kupa.
Nia hatutan, antes nee iha ona estudante Timor oan hamutuk nain 10 neebe durante nee eskola iha Kamboja no besik atu hotu ona.
(alb)
