DILI, STLNEWS.co – Too agora governu seidauk valoriza Timor oan sira neebe halo negosiu, fo liu fatin ba Xineza sira hodi domina negosiu iha Timor Leste (TL), hahu husi suku sepatu, servisu iha projetu kiik sira domina makaas husi Xineza.
“Tristi haree Timor oan sira faan sasan iha Xina nia loja oin, hanesan fali Xina mak rai nain, Timor oan mak bainaka, no aat liu tan governu haruka ema duni Timor oan sira nee halai ba mai deit, ida nee hatudu katak ita la valoriza i la dignifika ita nia maluk Timor oan no la fo oportunidade ba Timor oan sira atu buka moris iha nia rai rasik, husik atividade komersial domina husi Xineza sira,” preokupasaun nee hatoo husi Deputadu Luis Roberto ba STL iha Parlamentu Nasiobal, Tersa nee (21/03/2023).
Nia afirma, atu tane povu ho balansu mak husu ba governu tenki kria fasilidade neebe diak ba Timor oan sira, atu nunee sira bele halo negosiu ho diak. Ida seluk mak husu ba governu atu labele fo espasun ba Xina sira faan sasan neebe mak Timor bele produs, no bandu Xina labele mai loke kios iha rai laran hodi tak dalan ba Timor oan sira, tan nee husu ba governu tenki toma atensaun ho seriu, se lae mak aban bainrua Xina sei sai nain ba TL.
Nia katak, setor privadu Timor oan sira halerik, tanba sira atu ba halo negosiu ruma iha Xina, maibe ema la autoriza, tanba Xina nia kriteria rigorozu, serake sira mai iha TL governu husik livre hela mai loke kios, lo-loos tenki kria lei neebe rigorozu hodi regula Xineza sira.
Timor tenki kria lei ida hodi regula Xineza sira, karik sira hakarak mai halo negosiu iha TL tenki loke loja boot ruma hodi fo servisu ba Timor oan sira, laos mai loke kios hodi buka moris ba sira nia kabun deit, nee labele, tan nee presiza lei hodi regula, se lae nak neineik Xina mak sei ukun, hahu husi kapital Dili too iha suku no aldeia sira.
(mad)
