DILI, STLNEWS.co – Governu liu husi Ministeriu Komersiu no Industria preokupa jestaun merkadu iha kapital Dili, tanba sira halao reuniaun, kordenasaun servisu hamutuk ho Administrasaun Munisipiu Dili (AMD) konaba jestaun merkadu nomos negosiante sira neebe iha dalan publiku.
Ministru Komersiu no Industria, Filipus Nino Pereira dehan, halo reuniaun koordenasaun servisu ho Prezidente Autoridade Munisipiu Dili, konaba jestaun merkadu no faan nain sira iha dalan publiku.
“Ita preokupa vendadores sira iha merkadu Manleuana nomos merkadu Taibesi, maski balun sai husi merkadu Manleuana ho merkadu Taibesi, sira mai faan fali iha dalan publiku, ita preokupa, tanba nee ita hakarak jestaun neebe mak diak, no ita bele akomoda vendadores hotu-hotu hodi sira bele faan ho diak, ema bele mai sosa no ambiente neebe seguru,” hatete Ministru Komersiu no Industria, Filipus Nino Pereira ba jornalista sira, bainhira enkotru ho PAMD iha salaun AMD Kaikoli, Tersa (08/08/2023).
Nia tenik, iha vizita ida nee bele kria linha koordenasaun servisu diak hodi hadia jestaun merkadu rua nee, atu nunee bele fo tratamentu neebe dignu ba vendadores sira.
Iha fatin hanesan, Prezidente Autoridade Munisipiu Dili (PAMD), Guilhermina Filomena Saldanha Ribeiro esplika, ohin Visi Ministru Komersiu no Industria mai vizita AMD hodi koalia konaba situasaun iha sidade Dili, liu-liu ba jestaun merkadu nomos faan nain sira neebe iha dalan publiku.
“Ministru preokupa ba jestaun merkadu iha kapital Dili no vendadores sira iha merkadu liu-liu iha dalan ninin, ida nee sai preokupasaun ba ita hotu nian,” nia informa.
Nia deklara, problema ekonomiku sira la tane liman ba governu, maibe tenki buka dalan seluk liu husi faan iha dalan ninin hodi sustenta familia uma laran, inklui selu oan sira nia eskola.
Nia hatutan, lei la fo dalan vendadores sira faan iha dalan publiku, tanba Dili persiza organiza, maibe Autoridade Munisipiu Dili nian labele organiza sidade Dili sai organizadu, tanba vendadores sira lakohi koopera diak ho governu.
“Dili ita persiza organiza, tanba nee saida mak Autoridade Munisipiu Dili hasoru, entaun dezafiu no jestaun neebe ita nia pesoal vendadores sira, nomos fasilidade iha merkadu nee, ho ida nee mak Visi Ministru Komersiu no Industria mai hakarak haklean liu, saida mak ministeriu fo apoiu no koopera iha area saida mak bele organiza nomos asuntu ida neebe mak relasaun ho komersiu, nunee mos jestaun merkadu iha kapital Dili,” nia koalia.
Iha parte seluk, Negosiante Florenciana do Carmo husi Munisipiu Baukau dehan, maski governu pepara ona merkadu Manleuana nomos merkadu Taibesi, maibe faan iha dalan ibun rendimentu diak liu fali iha merkadu.
“Ita kontinua faan iha dalan ibun, tanba rendimentu diak, faan iha merkadu Taibesi no merkadu Manleuana rendimentu la hanesan,” nia esplika.
Nia informa, governu prepara merkadu rua nee ba negosiante, maibe dook husi estrada, tanba nee konsumidor barak mak la ba kompras iha neeba, tanba nee sira halai sai mai faan fali iha Rotunda Komoro.
“Hau uluk faan iha merkadu Manleuana, maibe hau nia produtu hau hola iha merkadu Taibesi, faan iha nee too semana ida ho balun, dodok hau soe deit, ida nee mak hau lakohi faan iha merkadu laran, tanba hau nia osan neebe hau hola sasan nee rezultadu laiha,” nia afirma.
(jen)
