DILI, STLNEWS.co – Governu neebe lidera husi Primeiru Ministru Kay Rala Xanana Gusmao promete katak, durante mandatu tinan 5 nia laran sira sei luta hodi hasae produsaun ai haan iha rai laran hodi redus importasaun rai liur, tan nee sei dezenvolve rai bokur sira neebe mak too agora sei abandona hela.
“Governu ida nee promete katak sei dezenvolve setor agrikultura iha TL sai diak, liu-liu hasae produsaun ai haan iha rai laran hodi redus importasaun fos husi rai liur, konaba pekuaria ita hakarak aumenta produsaun animal ba 20% hahu agora too 2028, ho nunee bele redus produtu importasaun animais husi rai liur,” dehan Primeiru Ministru Kay Rala Xanana Gusmao, bainhira aprezentasaun programa no osamentu ba iha Parlamentu Nasional, Tersa nee (18/07/2023).
Nia afirma, governu sei servisu hamutuk ho povu agrikultor sira iha baze, oinsa atu badinas diak liu tan hodi produs, tanba nee atu milhora diak liu agrikultor nia servisu iha naze, mak diak liu kria mos formasaun neebe diak iha sistema produsaun.
Governu ida nee mos sei fo importansia ba kafe organiku, oinsa hasae kuantidade produsaun iha nivel nasional hodi bele halo exportasaun ba rai liur ho kuantidade neebe boot no presu neebe justu, governu sei investe mos iha setor peska atu nunee bele minimiza peska ilegal neebe kontinua buras iha area tasi.
Iha fatin hanesan, fatin hanesn Deputada Dankada FRETILIN, Cristina da Costa hateten, governu tenki dezenvolve setor agrikultura ia TL, tanba setor ida nee hanesan parte ida neebe bele kontribui resetas ba kofre estadu. Tan nee atu husu deit ba governu ida nee katak, balansu saida mak governu ida nee halo ona ho VIII Governu, liga ho produsaun rai laran.
“Ita haree uluk kedas governu ida sae promete dehan atu hasae produsaun iha rai laran hodi redus importasaun husi rai liur mai, maibe realidade neebe akontese too agora seidauk iha governu ida neebe atu luta ba hasae produsaun, tanba nee mak dependensia TL nian aas tebes ba importasaun, maibe fiar katak governu ida nee bele luta hodi hasae produsaun rai laran,” dehan deputada nee.
Nia afirma, koalia konaba setor peska, too agora TL seidauk iha roo neebe nia kapasidade boot atu halo kontrola tasi too iha klaran neeba, tanba nee mak too agora peska ilegal sei kontinua buras, no fiar katak governu ida nee bele iha rekursu neebe naton hodi halo kontrola ba peska ilegal sira.
Nunee mos Deputada Maria Angelina Sarmento hateten, governu ida neebe liu ona ona nee mos halo ona esforsu lubuk ida, tanba nee husik ba povu mak bele fo sira nia hanoin, tanba intrese ema hotu nian maka hakarak luta hodi redus importassun husi rai liur.
(mad)
