DILI, STLNEWS.co – Relasiona ho disputa Timor Gap ho Timor Resourse ba perfurasaun posu iha Kosta Sul, IX Governu sei buka solusaun ho seriedade.
Visi Ministru Asuntu Parlamentares, Aderito Hugo hatete, konaba disputa entre kompanhia Timor Resourse ho Timor Gap neebe eziste kuaze tinan 3, IX Governu liu-liu ministeriu relevante aguarda hela lei organiku Ministeriu Petroliu Mineiru nian, iha tempu badak promulga.
Sei hamutuk ho autoridade ANPM, ho Timor Gap atu halo avaliasaun no kontinua buka solusaun ba kompanhia Estatal Timor Gap ho Timor Resourse ba disputa neebe sira iha.
“Liu-liu substansial kauza ba interpretasaun kontratu ba perfurasaun bloku hira iha Kosta Sul, IX Governu seriu atu buka solusaun, nunee kompleta lei organiku ministeriu nian, iha tempu badak”, informa Visi Ministru Asuntu Parlamentares, Aderito Hugo iha sesaun plenaria, Parlamentu Nasional, Tersa (29/08/2023).
Nia dehan, IX Governu iha semana rua ikus intensiva loos, atu kompleta tiha lei organiku ba ministeriu sira, liu-liu ba ministeriu sira neebe iha ligasaun ba kestaun nee hodi buka solusaun.
Nunee mos Deputada Bankada PD, Sancha Margarida Tilman katak, kona ba Ministru Petroliu Rekursu no Minerais, promete ona atu, rezolve sira hasoru iha ministeriu laran, iha tempu badak.
Deputada nee, husu ba IX Governu atu realiza duni promete neebe mak iha. Tanba sira rekomenda ba Parlamentu atu bele apoia sira nia orsamentu 2024 nian, bainhira debate.
Tuir nia, IX Governu liu husi ministeriu tenki seriu rezolve duni problema nee.
(gui)
