DILI, STLNEWS.co – IX Governu Konstitusional ofisialmente submete ona program ba Parlamentu Nasional (PN).
Programa nee entrega direita husi Visi Ministru Asuntu Parlamentar, Aderito Hugo da Costa ba Prezidente Parlamentu Nasional, Maria Fernanda Lay, iha resintu Parlamentu Nasional, loron 13 Julhu 2023.
Programa neebe entrega ona, hafoin aprova liu husi reniaun Konselhu Ministrus iha loron kuarta (12/07/23), sintetiza polítikas publikas prinsipais neebe atu adota durante governu ninia mandatu.
“Ami submete ona programa ba Parlamentu Nasional, tanba haree ba sirkuntansia oin-oin ho nesesidade atu governu nee entrega ninia atividade atu halao servisu ho lalais, hafoin hetan aprovasaun husi Konselhu Ministru,” dehan Aderito Hugo da Costa liu husi nota komunikadu neebe STL asesu husi media Gabinete Primeiru Ministru, Kinta nee (13/07/2023).
Programa nee IX Governu Konstitusional ho pajina 170 kompoin husi area prinsipál neen, hanesan afirma fila fali Estadu Direitu Demokratiku, dezenvolvimentu kapitál sosiál, dezenvolvimentu infraestruturas, dezenvolvimentu ekonomia, konsolidasaun governativa, boa governasaun no kombate hasoru korupsaun.
Programa hirak nee governu halo ho objetivu atu hametin no otimiza setores governasaun nian no sira nia rekursu, hodi habadak dalan atu transforma vizaun Ajenda Dezenvolvimentu Sustentavel 2030 nian no Planu Estratejiku Dezenvolvimentu 2011 – 2030 nian hodi sai realidade.
Konselhu Ministrus delibera ona mos aprezenta ba Parlamentu Nasional votu konfiansa ida ba governu, neebe fundamenta husi kompromisu neebe firme no determinadu governu atu implementa ninia Programa, ho objetivu atu promove dezenvolvimentu, prosperidade no moris diak ba sidadaun Timor oan.
(alb)
