DILI, STLNEWS.co – Reprezentante povu iha Parlamentu Nasional (PN) husu governu, liu husi ministeriu relevante atu halo manutensaun ba trator, nunee bele ajuda povu agrikultor sira halo toos ho natar.
Deputada Bankada FRETILIN, Maria Angelica Rangel dehan, relasiona ho preokupasaun povu agrikultor sira nian liga ba trator, los duni.
“Bainhira hau ba Same, Fatuberliu, Natarbora ho Vikeke, povu agrikultor sira dehan tratores sira neebe uluk ita halo investimentu sosa hodi tau ba iha sentru agrikultores sira nee, agora daudaun laiha manutensaun. Neebe urjentimente husu atu halo manutensaun ba tratores sira, tanba agora daudaun tama ona iha faze ida atu lere toos ho natar fatin, nunee bele kuda iha tempu udan mai,” dehan nia ba jornalista sira iha PN, Sesta (06/10/2023).
Nia sublina, se laiha manutensaun ba tratores sira nee, povu agrikultor sira tenki tesi ai hodi sunu rai. Nunee bele halo toos nomos natar, sei sai impaktu ba fali natureza bainhira tempu udan mai.
(dom)
