Governu Tenki Iha Politika Diak Prevene Inundasaun

DILI, STLNEWS.co – Reprezentante povu iha uma fukun Parlamentu Nasional (PN) husu governu atu halo politika diak, nunee bele halo prevensaun ba inundasaun neebe sempre akontese kada tinan.

Tuir Deputadu Bankada FRETILIN, Oscar Lima katak, inundasaun neebe akontese tanba udan, nee buat natureza, maibe kuandu udan presiza halo prevensaun, konstrusaun sira nee mos tenki fo atensaun prinsipal mak reabilitasaun kiik oan sira iha Dili nee.

“Tanba inundasaun horiseik akontese iha fatin barak, se bele governu buka halo reabilitasaun imediata, nomos lixu neebe ita soe arbiru deit, entaun ita sira hotu neebe hela iha Dili atu halo kontribuisaun, se laiha kontribuisaun mak sei la rezolve problema inundasaun. Entaun be dalan sira nee governu tenki iha politika ida atu haree konaba ema neebe halo uma iha fali valeta nia leten, depois foer soe fali ba valeta laran, kuandu udan bee ba labele avontade, hakarak ka lakohi sempre akontese inundasaun, tanba ita nia kontrola ba valeta sira nee mak insufisiente, entaun husu ba ministeriu relevante sira atu tau atensaun,” dehan nia ba jornalusta sira iha PN, Kuarta (10/01/2023).

Nia afirma, ba komunidade sira neebe mak halo fali uma iha valeta leten nee lalos, regras nee iha, mais ema mak la kumpri regras.

“Se ita hela iha sidade tenki kumpri regras neebe mak iha, se la kumpri regras mak automatika ita fo kulpa ba governu. Entaun governu nia obrigasaun atu kontrola, ida neebe lalos tenki hasai, nee mak governu nia obrigasaun,” tenik nia.

Nia hatutan, tanba haree horiseik udan boot tebes halo Dili laran kuaze afeta ba inundasaun, tanba nee husu komunidade sira hotu atu koopera hamutuk hodi kumpri ba regras, se lae mak nafatin hasoru problema inundasaun hanesan agora daudaun neebe sempre akontese kada tinan.

Aleinde nee, Deputada Bankada PD, Maria Teresa Gusmao dehan, ema hotu tristi haree situasaun horiseik iha Dili, udan boot tebe-tebes afeita ba inundasaun.

“Maibe mos estranu oituan katak, antes nee peritu nasional no internasional halo ona prediksaun ba ita nia klima iha Timor dehan katak, sei El-Nino naruk udan la mai, bailoron, neebe ita atrapalha loos oinsa ita atu prepara antisipa hasoru situasaun ida El-Nino nee, estranu derepenti udan boot mai estraga buat hotu-hotu, tanba analiza klimatika ho realidade, siensia dala ruma halo ita konfuzaun atu halo preparasaun,” hatete nia.

Nia tenik, maibe inundasaun iha Dili no fatin seluk laos buat foun, tinan-tinan kuandu udan boot mai sempre hasoru inundasaun, estragus buat barak tebes.

Nia afirma, ba parte povu sira atu iha konsiensia hodi tau lixu iha fatin, nunee parte tekniku lixeiru sira bele ba tula hodi tau iha fatin lixu neebe governu prepara ona iha Tibar. Entaun asuntu inundasaun nee hanesan solidadriedade ema hotu nian, ba tristeza boot ho situasaun ida neebe estragus buat barak tebes.

(dom)

LEAVE A REPLY

Please enter your comment!
Please enter your name here