DILI, STLNEWS.co – Reprezentante povu iha uma fukun Parlamentu Nasional (PN) husu atu halo investigasaun ba kazu ida neebe akontese iha Munisipiu Likisa, deskonfia Oknum FALINTIL – Forsa Defeza Timor Leste (F-FDTL) tiru kanek sidadaun ida.
Tuir Deputadu Natalino dos Santos husi Bankda CNRT katak, karik oknum F-FDTL ida tiru kanek sidadaun ida iha Munisipiu Likisa, mak parte relevante sira tenki halo investigasaun, nunee bele hatene lo-loos nia kronolojia, sala sidadaun nee iha neebe no tanba sa mak nia tenki hetan tiru husi oknum nee.
“Hanesan Timor oan ida, ita tristi, tanba saida mak kazu sira hanesan nee akontese beibeik iha rai ida nee, tan nee presiza investigasaun, nunee bele hatene se mak sala no se mak los, maibe ema neebe halo sala tenki prosesa tuir lei, ho nunee nia bele responsabliza ba aktus neebe nia halo,” dehan Deputadu Komisaun B neebe trata asuntu Seguransa no Defeza.
Nia afirma, karik kazu nee tama iha kategoria krimi, mak husu ba Autor Justisa no Orgaun Judisiariu sira atu haree, oinsa bele halo atuasaun hodi prosesa ba oin, liu-liu ema neebe halo krimi tenki responsablidade, tan nee enkoraja nafatin ba komando atu haree, hodi foti desizaun ruma hasoru oknum nee.
Tuir nia katak, aktus kriminal sira nee nain lo-loos mak Ministeriu Publiku no polisia, sira mak tenki halo investigasaun profunda ba kazu sira hanesan nee, ho nunee bele lori rezultadu neebe diak hodi satisfas povu sira.
(mad)
