DILI-STLNEWSco.-Reprezentante povu iha uma fukun Parlamentu Nasional (PN), husu, atu halo investigasaun ba kazu ida ne’ebe akontese iha Munisipiu Liquisa ne’ebe deskonfia Oknum F-FDTL ida tiru kanek sidadaun ida.
Tuir Deputadu Natalino dos Santos husi bankda CNRT katak, karik Oknum F-FDTL ida tiru kanek sidadaun ida iha Munisipiu Liquisa, maka tenke parte relevante sira tenke halo investigasaun, atu nune’e bele hatene lolos nia kronolojia, sala sidadaun ne’e iha ne’ebe, no tanba sa maka nia tenke hetan tiru husi Oknum ne’e.
“Hanesan Timor oan ida, ita triste, tanba saida maka kazu sira hanesan ne’e tenke akontese bebeik iha rai ida ne’e, tan ne’e presiza investigasaun atu nune’e bele hatene semak sala no se maka los, maibe ema ne’ebe halo sala tenke prosesa ho nune’e nia bele responsabliza ba aktus ne’ebe nia halo,” dehan Deputadu komisaun B ne’ebe trata asuntu Seguransa no Defeza ne’e.
Nia afirma, karik kazu ne’e tama iha kategoria Krime maka, husu ba Autor Justisa no Orgaun Judisiariu sira atu hare’e, oinsa bele halo atuasaun hodi prosesa ba oin, liu liu ema ne’ebe halo krime tenke, responsablidade, tan ne’e enkoraja nafatin ba Komandu atu hare’e hodi foti desizaun ruma hasoru Oknum ne’e.
Tuir nia katak, aktus kriminal sira ne’e nain lolos maka, Ministeriu Publiku, nomos Polisia, sira maka tenke halo investigasaun profunda ba kazu sira hanesan ne’e, ho nune’e bele lori rezultadu ne’ebe diak hodi satisfas povu sira.
(mad)
