ZUMALAI, sTLNEWS.co – Adjuntu Sekretariu Jeral Partidu FRETILIN, Antoninho Bianco hatete, hakarak subsidiu US$ 200 ba kada uma kain kontinua simu iha loron natal, tenki vota ba Partidu FRETILIN ukun iha governu da-9.
Informa Antoninho liu husi kampanha FRETILIN ba da-10 ho tipu dialogu hamutuk kuadru, militante no simpatizante sira iha Postu Administrativa Zumalai, Munisipiu Kovalima, Kuarta nee (03/05/20223).
“Ita bele dehan US$ 200 tinan-tinan povu bele simu iha uma kain ida-ida atu selebra natal ho tinan foun, maibe partidu balu dehan ita apoiu povu hetan para selebra natal nee ita kari rai rahun ba povu nia matan, se partidu ida dehan hanesan nee ita ba hili ba halo saida, hili mak FRETILIN para kontinua nafatin subsidiu U$S 200,” hatete Antoninho.
Nia hatutan, FRETILIN mos sei aplika programa kontratu sosial ho povu iha Timor laran tomak, hodi justifika bainhira manan iha eleisaun parlamentar tinan ida nee.
“FRETILIN programa halo kontratu sosial ho povu, para bainhira FRETILIN manan iha eleisaun parlamentar hodi kaer ukun karik atu justifika implementasaun programa neebe FRETILIN kontrata ona ho povu ba kada aldeia”, Adjuntu Sekretariu Jeral FRETILIN nee.
Tanba nee, tuir membru Deputadu husi Bankada FRETILIN nee katak, kontratu sosial nee lideransa FRETILIN mak sei lori ba aldeia idak idak atu asina para tau prioridde, hodi ezekuta ba komunidade bainhia povu fo fiar ukun iha eleisaun parlamentar.
Enkuantu tuir Antoninho, kontratu sosial nee ba povu sira hela iha kada aldeia timor laran tomak, tanba FRETILIN nia ukun laos ukun militante FRETILIN deit, maibe povu tomak entaun povu rai ida ne hotu-hotun iha direitu atu hetan.
“FRETILIN ba ukun nee ukun laos militante FRETILIN, mas ukun ba povu tomak, neebE ba povu tomak tenke hetan hotu”, hatete Adjuntu SekJer FRETILIN nee.
Nia fo ezemplu programa neebe FRETILIN banhira ba viabiliza oitavu governu konsege introduz ona, hanesan uma naroman ba povu, sesta baziku, subsidiu US$ 200 ba kada familia, no programa sosial sira seluk neebe povu rasik define iha aldeia ida-idak nian sai hanesan pontu importante atu rezolve bainhira Fretilin Ukun.
FRETILIN ukun atu harii progrma ida ho naran kooperativa atu halo produsaun ba produtu agrikultura, hadia estrada rural hodi envolve populasaun rasik atu bele hetan osan hodi sustenta familia.
Aleinde nee harii sentru formasaun para atu fasilita joven sira atu prepara an ho profesional hodi koresponde kampu trabalhu tantu iha rai laran nomós husi rai liur, no atividade negosiu kiik ho kreditu suavel.
Iha fatin hanesan membru Komisaun Politika Nasional, Manuel Nakfilak hatete, Se iha tinan 20 resin ba sira neebe mak iha Dili hetan oportunidade tur hanesan Deputadu, membru governu no seluk tan mak hatene deit goza ba natal ho tinan foun, tanba salariu diak,maibe tinan ikus ida nee 2003 povu maubere ida nee komesa senti duni oinsa mak halo pasajen hamtuk ho nia familia.
“Se uluk ami hatene loke sampanya no han kek iha Dili maibe ohin loron povu koko mos ona sabor sampanya nian oinsa no dosi kek nian mos oinsa, tanba FRETILIN hatene dignifika nia povu ida nee liu husi subsidiu U$S 200,”hatete Nakfilak.
Entretantu reprezentante Koordendor Partidu FRETILIN Munisipiu Kovalima, Alex hatete, iha ambitu dialogu ida nee atu hatoo programa ba povu laos sae iha palku hodi insulta malu, maibe FRETILIN mai iha povu nia leet atu haklaken ninia programa neebe fo benefisiu direita ba povu nia moris, tanba povu ida nee terus iha tinan barak ona.
“Tinan 24 povu buibere ho maubere nia oan sira terus, ukun aan tiha tinan 20 resin mos povu maubere ho buibere nia oan sira terus nafatin, tanba ukun laloos gasta osan arbiru maibe buka osan mos lahatene, ema seluk buka osan nia hein gasta deit gasta mos la tuir nia dalan,” hatete Alex.
(car)
