DILI, STLNEWS.co – Relasiona ho meza Parlamentu Nasional (PN) hakotu ona mandatu Komisariu Komisaun Anti Korupsaun (KAK) neebe extende, tanba komisariu book kazu balu atu halo investigasaun.
Xefi Bankada CNRT, Duarte Nunes hatete, meza PN haruka karta hapara Komisariu KAK, nee knaar Prezidente Parlamentu Nasional nian atu extende ka lae, maibe maneira neebe sira obriga atu altera lei KAK.
Maibe nee sira la fo valor ba instituisaun KAK, i sira hanoin katak KAK nee laiha folin no valor, tanba sira hakarak altera ba interese sira nian, tanba nee buka maneira hodi hapara.
“Sira extende komisariu, agora nee sei kedok nafatin kazu balu neebe iha, sira hapara hodi obriga atu tau fali kandidatu neebe tuir sira nia hakarak”, katak Xefi Bankada CNRT, Duarte Nunes ba STL liu husi telefone, iha Dili, Sesta nee (07/04/2023).
Duarte hatete, tuir sira nia haree meza halo ida, tanba hakarak atu subar tiha kazu barak hodi taka tiha sira nia hahalok neebe liga ba korupsaun. Tanba nee, sira buka sira nia ema hodi taka tiha buat neebe sira nia hakarak.
Nia katak, agora daudaun Komisariu KAK PN hapara ona, ida nee instituisaun nee paradu hela tanba laiha lideransa atu lidera instituisaun nee, mezmu iha adjuntu maibe nee komasariu mak hili, tanba nee kuandu komsariu laiha ka la servisu sira mos la servisu.
Xefi Bankada CNRT nee afirma, meza foti desizaun nee kompetensia sira nian, maibe nee sira la fo ona valor ba instituisaun KAK, tanba sira haree komisariu agora nee ema independente no atu book kazu neebe tama iha neeba inklui roo Haksolok, tanba nee la tuir sira nia hakarak, nunee sira hapara.
Entretantu, STL koko konfirma ho meza PN ho Segundu Visi PN, Luis Riberto via telefone, maibe nia parte sei okupadu hela.
(gui)
