DILI, STLNEWS.co – Trabalhador Timor oan iha Australia halai sees husi sistema, laos ilegal, maibe tanba kondisaun obriga.
Tuir Sekretariu Estadu Politika Formasaun Profisional no Empregu (SEPFOPE), Rogerio Araujo katak, trabalhador Timor oan halai sees husi sistema tanba kondisaun. Uluk hanesan ema akompanha iha Australia momentu neeba, tanba servisu tuir tempu deit kuu aifuan. Neebe tempu kuu aifuan sira servisu, maibe aifuan laiha sira laiha servisu no la simu osan.
“Sira sees husi sistema uluk, tempu Covid-19 aeroportu taka, sira la servisu laiha osan selu alojamentu, obriga sees husi sistema, maibe laos ilegal, sees husi sistema buka osan hodi haruka ba familia iha Timor,” dehan Rogerio Araujo ba jornalista sira, bainhira remata enkontru ho Primeiru Ministru iha Palasiu Governu, Kinta (10/08/2023).
Nunee mos Embaixadora Timor-Leste ba Australia, Ines Maria de Almeida hatete, bainhira sira ba Australia sees husi sistema sira hatama aplikasaun ba governu bolu naran, protaction viza husi nee Australia fo breefing viza, sira bele kontinua servisu maibe ho prosesu, nee tama ona sistema Australia nian, Timor labele ba manda.
“Hau lao ba fatin barak haree sira nia kondisaun, situasaun, hatoo ba governu konaba situasaun sira neebe sira enfrenta, ema hotu koalia katak sira ilegal, sira laos ilegal,” katak nia.
Sira nee ba servisu kuu aifuan tuir tempu, tanba bainhira aifuan laiha, nee labele obriga, entaun laiha servisu ba sira, la simu salariu, maibe sira nia alojamentu tenki selu nafatin, difikulta ba sira laiha osan, obriga sira ba buka fali toos seluk, sira hatama aplikasaun, hodi buka servisu, maibe sistema Australia komplikadu, tanba tenki lao tuir prosesu.
Embaixadora nee hatete, nudar Xefi misaun, orgulhu tebes Timor oan hotu iha Australia, servisu ho etika, disiplina oras, la halo problema, buka servisu simu osan haruka ba familia, kontribui mos ba dezenvolve nasaun.
Tuir dadus neebe STL asesu katak, trabalhador Timor oan neebe halai sees husi sistema SEPFOPE, bainhira servisu iha estranjeirus hamutuk 1600, neebe kompostu Korea do Sul 1000, Australia 600.
(gui)
