Hametin Estabilidade, Governu Tenki Maioria

DILI, STLNEWS.co – Prezidente Republika Jose Ramos Horta hatete, atu hametin estabilidade iha rai laran no dudu dezenvolvimentu ba oin, governu tenki ho maioria.

Prezidente Republika Jose Ramos Horta hatoo lia hirak nee ba jornalista sira, bainhira halo despedida ho atleta Sea Para Games Kamboja, iha Palasiu Prezidente Bairu Pite, Kinta (25/05/2023).

Nia hatete, oras nee seidauk rona rejultadu husi tribunal, maibe ema hotu haree laiha partidu ida manan maioria, tanba nee partidu neebe vensedor mak CNRT, maibe presiza bolu tan partidu ida rua nunee governu bele forti.

“Ita seidauk rona rezultadu konfirmadu husi Tribunal Rekursu, semana ida tan karik, maibe tuir observasaun dadus hotu-hotu laiha partidu ida manan maioria absoluta, hau nia opinaun uluk kedas partidu neebe manan maioria absoluta ka lae, mezmu manan maioria absoluta buka konvida partidu ida tan ka rua forma governu para hetan maioria boot liu, nunee bele hametin liu tan estabilidade rai laran iha governasaun,” katak nia.

Prezidente dehan, oras nee laiha partidu ida manan maioria absoluta, maibe Partidu CNRT mak iha oin, prezidente mos fiar Prezidente Partidu CNRT Xanana Gusmao iha partidu nia laran estuda, haree se mak CNRT sei bolu ba forma koligasaun.

“Solusaun uniku kuaze diak mak nee, CNRT ho partidu ida ka rua tan ou ho partidu ida deit hamutuk mos sufisiente. Hau haree situasaun dezafiu boot ba rai nee, governu ida tenki hatudu nia matenek nia vizaun para oinsa halibur hotu-hotu para governu forti, Parlamentu Unidu para rai nee haksoit ba oin,” katak nia.

Xefi Estadu hatete, governu agora presiza forti no parlamentu mos presiza unidu hodi nasaun lao ba oin, tanba dezafiu boot Timor Leste nia adezaun ba ASEAN servisu todan los, atu halo rekuperasaun ba ekonomika.

“Ita labele hanoin para gasta deit osan, se gasta osan tenki iha retornu, tenki iha produtivu, klaru buat balun investe, maibe laiha duni retornu imediatu tanba laos ba faan sasan, investimentu ba juventude, investimentu ba kosok oan sira, nee investimentu boot tebes, retornu sei boot ba futuru kuandu labarik ho saude diak, neebe estuda rejultadu tanba saude diak, depois ba universidade rejultadu diak, signifika investimentu ba futuru mak nee,” katak nia.

Nunee mos Prezidente Partidu Demokratiko Mariano Asanami Sabino haktuir, seidauk bele fo komentariu, rejultadu sai ona mak foin fo resposta.

“Partidu Politiku tenki respeita regras, tanba nee ita asina akordu, tanba nee remata lai mak ita koalia, se partidu mendahului keputusan tribunal rekursu, entaun partidu nee ladun komprende karik, neebe partidu neebe mak hatene tenki tuir regras, regras nee remata mak foin koalia,” katak nia.

(eme)

LEAVE A REPLY

Please enter your comment!
Please enter your name here