DILI, STLNEWS.co – Ministru Negosiu Estranjeiru (MNE) Japaun sei vizita estadu mai Timor Leste, hodi hametin kooperasaun bilateral entre Timor Leste ho Japaun.
Lia hirak nee hatoo husi Embaixador Japaun iha Timor Leste, Kimura Tetsuya ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidente Bairo Pite, Kuarta (05/07/2023).
“Hau mai halo enkontru ho Prezidente Republika, koalia konaba vizita Estadu MNE Japaun nia mai Timor Leste, iha neebe sei hasoru malu ho Prezidente Republika, no sei hasoru malu ho Primeiru Ministru, Prezidente Parlamentu Nasional, nomos Ministru Negosiu Estranjeiru,” katak Embaixador.
Nia hatete, remata ona tomada de pose ba membru IX Governu, tanba nee sei mai hodi koalia konaba kooperasaun bilateral rai rua.
Embaixador dehan, mensajen vizita Ministru Estadu Japaun nia sei foka ba parte rua, primeiru lasu amizade entre nasaun rua nian, hodi hametin liu tan kooperasaun bilateral ba dezenvolvimentu nasaun nian, no segundu kontinua apoiu esforsu Timor Leste tama ba ASEAN.
Prezidente Republika Jose Ramos Horta hatete, hametin kooperasaun bilateral entre Timor Leste ho Japaun, nee importante tebes iha futuru.
(eme)
