Hasae Taxa Importasaun Povu Terus Han-Hemu

DILI, STLNEWS.co – Governu anterior hasae taxa importasaun, prezudika ba folin merkadu sae. Situasaun nee halo terus povu bainhira atu han no hemu susar tebes, tanba nee IX Governu redus taxa importasaun hodi fo kbiit ba povu.

Kestaun nee hatoo husi Primeiru Ministru Kay Rala Xanana Gusmao, katak konaba impostu los, iha preokupasaun husi povu rasik, i sosiedade mos hatun impostu, maibe reseita la tama, halo nusa mak governu no estadu nee bele moris bele sustentavel se reseita la tama. Sira la akompanha mundu, maibe rona iha rai neebe dezenvolvidu tebes, kuandu krize ruma povu terus, mak governu fo ajuda.

“Iha Timor problema oin-oin, sa tan Fundu Petroliferu (FP) labele gasta arbiru, hanoin tenki simu reseitas barak, hasae taxa importasaun, depois povu senti susar. Reseita tama, tanba impostu boot, hodi halo UKL barak, maibe povu han atu sosa mina labele tanba osan laiha”, katak Xefi Ezekutivu Kay Rala Xanana Gusmao iha debate OR, ba loron dahuluk, Tersa (22/08/2023) iha PN.

Nia dehan, iha rai barak, kuandu buat hotu lao diak mak aumenta taxa hodi simu iha reseitas. Maibe bainhira krize boot estadu hasai osan fo ajuda liu husi subsidiu.

“Hatun impostu foos no sasan seluk tan, neebe laos deit haree ba atu fasilita investor sira lae, maibe haree ba povu neeebe haan laiha, katuas, ferik sira laiha kbiit atu sosa hahan ruma, hodi fo netik kbiit ba sira”, tenik Xanana.

Nia hatete, reseita domestika ba estadu, haree ba povu nia moris, estadu simu reseitas boot, maibe koitadu povu, estadu bele simu reseitas husi US$ 5-10 milhaun mos sei iha FP, tanba nee labele gasta arbiru FP atu bele sustentavel hodi hamenus povu nia terus.

Tuir Xanana, nee mak IX Governu hatun taxa importasaun hodi hamenus povu nia terus, tanba hasae taxa nee folin merkadu sae, povu sosa hahan labele.

(gui)

LEAVE A REPLY

Please enter your comment!
Please enter your name here