Hetan Fiar Husi Povu, PST-PR Sei Implementa Programa

DILI, STLNEWS.co – Karik hetan fiar husi povu hodi forma IX Governu, Partidu Sosialista Timor (PST) no Partidu Republika (PR) sei implementa programa hotu neebe mensiona iha kampanha laran.

Programa PST mak hanesan, defende rai, subsidiu ba agrikultor, asaun ba trabalhador, ensinu no saude gratuitu no kriasaun kampu trabalhu ba joven sira. Entretantu PR sei hadia ekonomia iha rai laran liu husi apoiu kreditu ba povu kiik ho funan laiha, fasilita inan aman sira neebe laiha kbiit atu dudu oan ba eskola nomos programa sira seluk neebe partidu iha.

“PST luta ba sosializmu popular kultura Timor nian, tanba ida nee estadu laiha rai, no rai nee povu nian, atu defende rai povu nian mak estadu tenki investe iha setor agrikultura, ka fo subsidiu ba agrikultores transforma agrikultura subsistensia ba agrikultura moderna industrializada katak, tenki iha industria agrikula iha munisipiu idak-idak neebe sei desidi kada munisipiu iha nia karakteristika industria ou sentru prosesamentu hodi halo tranformasaun produtu agrikula ba iha merkadu,” dehan Prezidente PST, Avelino Coelho ba STL, Kuarta (17/05/2023) liu husi telefone.

Prezidente PST Avelino hatete, atu rezolve problema dezempregu, bainhira PST hetan kadeira ba forma IX Governu ho partidu balun karik ou ba parlamentu, hakarak kria brigada tekniku profisional agrikula hodi kria kampu trabalhu ba Timor oan, joven no estudante sei hola parte iha brigada nee, no sai hanesan ajente atu halo transformasaun agrikultura subsistensia ba agrikultura, mekanizada modernizada no industrializada.

Tuir nia, komesa fulan Julhu too Dezembru governu bele rekruta ona brigada nee pelu menus rihun 20 ou 40 joven no estudante sai brigada agrikula, nunee ho projesaun durante tinan 5 bele kria kampu trabalhu mais de 80 ou 90 mil.

Bainhira industria dezenvolvidu, agrikultura dezenvolvida empregu ba Timor oan sei barak, PST la konkorda ho politika neebe atu lori Timor oan sai trabalhador servisu iha liur, tan nee PST sei kria kampu servisu 20 0u 40 mil iha tinan nee nia laran, depois tinan oin kontinua projesaun depende ba dezenvolvimentu transformasaun setor pekuaria, agrikultura no peska.

“Sira sai brigada agrikula katak, sira mak sei lídera prosesu libertasaun do povu, tanba nee tenki vota PST, laiha dalan seluk hakarak muda situasaun tinan 21 buat hotu paradu, PST garante sei liu bareira hodi koalia forma koligasaun ho partidu neebe manan barak liu, tanba PST preparadu atu hetan asentu iha Parlamentu Nasional,” dehan Prezidente PST.

Iha parte seluk, Prezidente Partidu Republika, Joao Saldanha hateten, iha eleisaun mai mak povu fo fiar ba Partidu Republika ba kaer ukun mak sei hadia ekonomia iha rai laran, liu husi apoiu kreditu ba povu kiik ho funan laiha, fasilita inan aman sira neebe laiha kbiit atu dudu oan ba eskola nomos programa sira seluk neebe partidu iha.

“Ami iha programa lubuk ida mak hanesan re anunsia katak, membru parlamentu i membru governu husi Partidu PR nian, sei la foti pensaun vitalisia, no osan nee bele aloka fali ba halo uma, estrada no eskola, atu nunee bele fasilita povu, fo kreditu funan laiha, fo sertifikadu rai, 50 mil tinan-tinan ba rai sira neebe laiha kompensasaun, hasae produsaun agrikula, no loke mos fabrika hodi fo servisu ba Timor oan sira, hasae produsaun rai laran nomos produsaun kafe, hasae produsaun iha rai laran hodi redus importasaun rai liur, no halo reforma ba funsionariu sira neebe mak idade 60 ona,” dehan Prezidente PR.

Prezidente Partidu nee mos husu ba povu atu vota ba Partidu PR, tanba Partidu PR iha nia programa sira neebe diak, no garante atu hadia povu nia moris, nomos setor privadu sira bele asesu ba kreditu ho funan laiha, moderniza setor hotu-hotu, atu nunee bele hadia povu nia moris.

(mad)

LEAVE A REPLY

Please enter your comment!
Please enter your name here