DILI, STLNEWS.co – 30 de Agosto loron neebe importante hodi hanoin no halo refleksaun ba sakrifisiu povu tomak, hodi vota ba ukun rasik aan. No loron importante nee hanoin mos Timor oan neebe sakrifika nia vida hodi hetan liberdade.
Lia hirak nee hatoo husi Prezidente Republika Jose Ramos Horta liu husi nia mensajen ba 30 de Agosto iha Palasiu Prezidente Nicolao Lobato Bairo Pite, Kuarta (30/08/2023).
Nia hatete, Loron 30 de Agosto loron konsulta popular 1999 liu tiha tinan 24 nia laran, husi povu no liu husi maun boot Xanana Gusmao nia lideransa nia matenek no vizaun halo konsulta popular.
“Ita hakruuk ba memoria sira hotu neebe hahu fo sira nia vida, sira nia terus hetan tortura, hamlaha no dezafiu oin oin hahu kedas 1975 hahu ho lideransa Save, Avo Francisco Xavier Amaral, Lideransa Nicolao Lobato, Lider Karismatiku premeiru, Primeiru Ministru TL, Vise Prezidente Republika depois Prezidente bainhira Xavier Amaral ses Aan nudar Prezidente momentu neeba,” katak PR Horta.
Nia hatete, baze apoiu monu, Comite Central kuaze mohu, Lider Karismatiku Xanana Gusmao mak mosu hodi asumi responsablidade ba kontinuasaun luta.
“Ba sira hotu neebe mak mate fo sira nia vida, no ba sira neebe terus iha tinan lubuk nia laran mak ita too konsulta popular, neebe povu deside ninia futuru no destinu hakruuk ba sira loron ida nee, loron ida nee laos hanesan ita ba tasi ba peknik no deskansa iha uma, maibe loron ida nee aproveita halo refleksaun ba sakrifisiu ba Timor oan hotu neebe mate para rai ida nee mosu nuudar Republika Demokratika Timor Leste,” katak Horta.
Nia hatutan, 30 de Agosto agradese mos ba komunidade internasional liu liu matebian Sekretariu Jeral ONU Kofi Anan, neebe tau prioridade Timor Leste iha nia ajenda nuudar Sekretariu Jeral, no hakruuk mos ba Nasaun Portugal potensia atmitranse neebe la abandona no la soe sira nia responsablidade.
“Agradese ba povu portugues, ba Lider hotu iha Portugal, Prezidente Republika, Primeiru Ministru, deputadu sira neebe tinan sira nia laran la soe kestaun Timor monu, agradese no rejistu boot ba pais CPLP hanesan Angola, Brazil, Cabo Verde, Guine bisau, Mocambique, Sao Tome prinsipe, grupu CPLP neebe Timor Leste hola parte ba sira hotu ita nia agradesementu boot, no ita hanoin nafatin solidaridade internasional iha mundu tomak tinan 24 nia laran sempre hamutuk ho ita lahusik povu nia liafuan, foti Timor nia sofrimentu korajen ba mundu tomak,” katak nia.
Xefi Estadu afirma, nasaun ida nee livre moris iha dame, Moris iha estadu direitu demokratiko, liberdade iha politika no liberdade relijaun sei kontinua nafatin, nemak obrigasaun Timor nia, no TL nia komitmentu ba sira neebe mak mate no ema sira neebe sei moris para TL kontinua moris livre no demokratiko respeitu ba direitu Humanus, liberdade Imprensa liberdade relijaun laiha diskriminasaun iha relijaun ba etnika politika.
Iha biban nee, Prezidente Republika mos hatoo Parabens ba sidadaun hotu, neebe mak selebra 30 de Agosto nudar loron popular, povu barani vota hodi manan referendum.
(eme)
