DILI, STLNEWS.co – Prezidente Republika (PR) Jose Ramos Horta halo enkontru ho Grupu Empreza Quam Plus International Financial, lTD, hodi koalia konaba investimentu neebe empreza nee sei halo iha Timor Leste (TL).
Bainhira remata hasoru malu Chief Investment Officer, hanesan mos Managing Director, Mark Tinker, ba jornalista iha Palasiu Prezidente Bairru Pite, Kuarta nee (27/09/2023) hatete, kontenti tebes hasoru malu ho Prezidente Republika no sira husi Hong kong.
“Ami nain 4 mai husi Hong Kong, ami nudar investor, ami espesializadu iha pensaun jestaun riku soin nomos investe iha nasaun sira hanesan TL. Nee mak ami primeiru iha nee ami kontenti tebes,” hatete Mark.
Nia afirma, iha enkontru ida neebe interesante tebes ho prezidente, no sira senti kontenti tebes ho oportunidade sira hodi koalia ho Prezidente Republika.
“Nuudar investor hau reprezenta hanesan hau nia kolega Jonathan Tosca fan, neebe nudar xefi ba patrimoniu alternativu ida neebe lidera husi baze governu. Ami husi Hong Kong no hau nia kolega sira iha nee reprezenta kualidade, neebe nudar finansiamentu naun-banku ida neebe lidera husi Hong Kong. Ami servisu hamutuk ho emprezariu oin-oin, neebe mos buka atu investe sira-nia osan rasik iha oportunidade intersante sira,” katak nia.
Nia hatutan, sira laos deit fundu pensaun ka kompanha seguransa. Sira servisu hamutuk ho ema sira neebe hakarak investe iha negosiu real no sira interese tebes ba istoria hanesan nee.
Nia haktuir tan, sira mos rona buat barak intersante iha Timor Leste maibe sira foin mai. Tan nee, durante iha Timor sira aprende ho nia kolega sira investor husi Malazia neebe iha esperiensia barak.
Iha biban nee, Prezidente Republika Jose Ramos Horta hatete, senti kontenti hasoru malu ho Grupu Empreza Quam Plus International Financial, hodi koalia hamutuk oinsa mak halo investimentu iha TL.
Prezidente Republika mos afirma, durante nee nia mos kontaktu ho investor barak hodi mai halo investimentu iha TL, maibe investor sira mai halo observasaun uluk depois mak desidi atu halo investimentu.
(eme)
