Horta: Funu Ukraina Kauza Presu Distribuisaun Bens Esensial

DILI, STLNEWS.co – Prezidente Republika (PR) Jose Ramos Horta hatete, funu iha Ukraina sai kauza ba distribuisaun ba bens esensial sira.

Prezidente Republika Jose Ramos Horta hatoo kestaun nee liu husi diskursu iha ambitu selebrasaun loron proklamasaun independensia ba dala 48, iha Palasiu Prezidente Bairo Pite, Tersa (28/11/2023).

“Funu iha Ukraina no presaun inflasionariu neebe sai kausa ba ida nee kontribui ba volatilidade presu no distribuisaun ba bens esensial sira, halo ita nia luta kontra pobreza sai komplikadu liu tan. Ita tenki adopta abordajen abrangente no inkluzivu. Investimentu iha edukasaun mak investimentu iha futuru. Ita tenki garante katak labarik hotu-hotu iha asesu ba edukasaun neebe ho kualidade, kapasita sira atu hasoru dezafiu sekulu XXI no kontribui ba dezenvolvimentu sustentavel,” dehan PR.

Nia hatutan, subnutrisaun inan ho oan mak bareira neebe signifikativa ba progresu. Presija implementa polítika no programa neebe garante seguransa alimentar, hodi insentiva pratika agríkola sustentavel no promove asesu ba ai-han nutritivu. Kria oportunidade empregu, liuliu ba juventude sira, nee fundamental atu garante tranzisaun jerasional neebe lao diak no haforsa baze dezenvolvimentu. Apoiu ba empreendedorismu, promosaun setor estrategiku no dezenvolvimentu kapasidade sira mak xave ba prosesu hirak nee.

Xefe Estadu hatutan, Atu Kumpri Objetivu Dezenvolvimentu Sustentavel (ODS) mak jornada ida neebe refleta kompromisu laos deit ho povo rasik, maibe ho komunidade global. Presiza determinadu los atu aborda kestaun krusial sira, hanesan erradikasaun pobreza, promosaun ba igualdade jeneru, garante asesu ba edukasaun no saude neebe ho kualidade, no konstrusaun ba sidade no polo dezenvolvimentu sustentavel.

Aleinde nee Horta hatutan, forsa militar Hamas nian, la justifika krime seluk hanesan agresaun ba populasaun sivíl neebe labele defende-an, taka no impede aksesu ba medikamentu, produtu aliementar no produtu esensial sira ba sobrevivensia populasaun, la justifika destruisaun infraestrutura sivíl neebe jeraliza no aumenta drama humanitariu no sosial neebe akontese iha area teritoriu nee.

“Autoridade Hamas nian halo krime grave no desprezível, maibe resposta Israel nian demais liu tan no halo autoridade Israel nian responsael ba vítima rihun ba rihun husi sivíl (14,758 husi Palestina) no potensialmente responsavel ba krime kontra Umanidade.Tanba nee ami apela ba sesarfogu imediatu no labele demora iha libertasaun ba dalan forneseimentu no apoiu humanitariu, atu ajuda vítima sivíl sira neebe ami kondeena forte iha konflitu nee. Segundu, kondena konflitu armadu iha Ukraina,” katak nia

Nia hatutan, agresaun Rusia ba Ukraina, kompleta iha 2024, tinan rua konflitu armadu laiha interrupsaun. Timor-Leste kontinua solidariu ho Povu no Governu Ukraina nian, tanba agresaun armadu ida nee hanesan violasaun momoos ba direitu internasional no Karta Nasaun Unidas nian.Konflitu neebe destrui infraestrutura Estadu Soberanu no Independente ida nian, ho prejuízu ekonomiku no sosial neebe barak liu, iha neebe soma vítima sivíl inosente no resulta iha eksodu ba ema refujiadu sira tokon ba tokon.

“Konflitu neebe, maski lokalizadu iha Europa, afeta negativamente nasaun hotu iha Mundu, laiha exesaun, kria prizaun inflasionariu ba produtu aliementar no produtu esensial sira, ho impaktu negativu barak-liu ba nasaun sira neebe frajill, kiak liu no menus dezenvolvidu, hodi agrava situasaun pobreza, subnutrisaun maternu-infantil no inseguransa alimentar, neebe rejistadu iha nasaun sira neebe menus riku hanesan Timor-Leste,” katak Horta.

(eme)

LEAVE A REPLY

Please enter your comment!
Please enter your name here