DILI, STLNEWS.co – Prezidente Republika Jose Ramos Horta hasoru malu ho Ministra Negosius Estranjeiru Republika Indonezia, Retno Marsudi, hodi koalia konaba Simeria ASEAN no preparasaun Timor-Leste atu adere ba ASEAN.
Liu husi komunikadu neebe STL asesu husi Prezidensia Republika Kuarta nee (09/08/2023) hatete, Prezidente Republika hasoru malu ho Ministru Negosiu Estranjeiru Indonezia, hodi koalia konaba Simeria ASEAN nia.
“Hau enkontru ho Ministra Retno, ami koalia kona-ba Simeira ASEAN. Hau sei partisipa, tanba kombina ona ho Primeiru Ministru Xanana. Mai nuudar reprezentante Estadu Timor,’’ esplika Prezidente Ramos Horta.
Xefi Estadu hatete, iha hasoru malu nee diskuti realizasaun roadmap (roteiru) neebe Timor-Leste liu husi Primeiru Ministru sesante, Taur Matan Ruak, simu iha Simeira ASEAN iha Labuan Bajo, Provínsia Nusa Tenggara Timur, fulan liu ba.
‘’Roadmap nudar matan dalan ba Timor-Leste hodi prienxe rekezitu sira molok tama ofisialmente nuudar membru ASEAN,” nia tenik.
Tuir Xefi Estadu, tinan nee sei esforsu atu partisipa enkontru sira no kompleta rekezitu hotu, tanba konkordansia entre nia ho Xanana Gusmão nuudar Xefe Governu, katak Timor-Leste sei tama ASEAN bainhira kompleta ona rekezitu.
Konkordansia ida nee Prezidente Ramos Horta mos informa ba ASEAN, liu husi enkontru ho Ministra Retno Marsudi, katak Timor-Leste preparaduliu hodi tama iha ASEAN iha tinan 2025 ho razaun Governu foun foin mak lao.
‘’Se ita tama iha 2025, Governu atual pelu-menus iha tempu atu prienxe kondisaun sira iha roadmap,’’ afirma Xefi Estadu.
Tuir Planu, Prezidente Ramos-Horta sei fila hikas ba Indonézia iha fulan-Setembru nee hodi partisipa iha Simeira Xefi Estadu ASEAN hodi informa Timor-Leste nia preparasaun.
Enkontru Prezidente Ramos-Horta ho Ministra Retno Marsudi, akompanha mos husi Visi Ministra Negosius Estranjeirus no Kooperasaun Assuntu ASEAN, Milena Rangel, Embaixadór Timor-Leste ba Republika Indonezia, Filomeno Aleixo no husi Embaixador Republika Indonezia mai Timor-Leste, Okto Dorinus Manik.
(eme)
