DILI, STLNEWS.co – Prezidente Republika (PR) Jose Ramos Horta rezeita informasaun neebe mak hatoo iha media sosial katak, nia parte partisipa konsolidasaun Partidu CNRT iha Munisipiu Baucau, maibe prezidente ba hatoo agradese ba apoiantes, neebe durante nee apoiu nia hodi kandidata ba iha prezidente.
Prezidente Republika Jose Ramos Horta hatoo kestaun nee ba jornalista sira, bainhira remata partisipa serimonia Graduasaun estudante Universidade Nasional Timor Lorosae (UNTL) iha Centro Convencao Dili (CCD) Kaikoli, Tersa nee (11/04/2023).
“Nee laos publiku, maibe politiku balun mak kestiona. Hau laos ba kampanha politiku, hau ba vizita Baucau, tanba hau nia apoiantes lubuk ida iha neeba, dezde hau nia mandatu premeiru iha Baucau, Laga neebe deit, hau mak hakarak ba, tanba tinan ida besik ona hau la ba agradese sira, tanba nee hau ba agradese,” katak nia.
Prezidente hatete, atividade iha Munisipiu Baucau mos laos ba konkolidasaun Partidu CNRT nian, no prezensa prezidente nia iha neeba vizita hodi hatoo agradese ba povu neebe durante nee apoiu Xefi Estadu, no iha vizita nee lider karismatiku Xanana Gusmao mos la marka prezensa.
“Iha neeba iha ema FRETILIN, PLP, ema neebe deit iha kampanha hau nian, sira apoiu hau. Entaun hau ba hatoo agradese deit, maibe depois politiku balun mak stres, tanba dehan ba Baucau nee halo saida ba doko knuuk iha neeba, lae, hau la ba book, hau ba deit agradese ema, hau ba pasiar iha vila laran sosa ema nia hahan, modo no aifuan oin-oin iha Aeroportu. Hau para hodi sosa hahan, hau nia kareta kiik nakonu ho produtu Baucau nia,” dehan nia.
Nunee mos Tuir Visi III Prezidente CDN Partidu CNRT, Virgida Antonia Coreia hatete, iha tempu neeba prezidente laos ba partisipa iha konsolidasaun Partidu CNRT nia, maibe prezidente mos ba ninia atividade ketak ida mak mai vizita liu deit, laos ba partisipa konsolidasaun partidu.
“Prezidente mos iha atividade ida, nia ba hatoo agradese ba ninia apoiantes sira neebe mak durante nee apoiu nia, tanba durante nee nunka hasoru malu, entaun prezidente aproveita ba hatoo agradese no prezidente iha ninia atividade ketak, laos ba partisipa konsolidasaun CNRT nia,” dehan nia.
(eme)
