DILI, STLNEWS.co – Prezidente José Ramos Horta halo enkontru ho Diretor Jerál Organizasaun Mundial Saude (OMS), koalia konaba kooperasaun servisu iha asuntu saude.
Tuir komunikadu neebé STL asesu husi media Prezidente Republika iha Sesta (06/10/2023) hatete, vizita iha Jenebra, Suisa, Prezidente Timor-Leste Jose Ramos-Horta hasoru malu ho Diretor Jeral Organizasaun Mundiál Saude (OMS), Tedros Ghebreyesus iha eskritóriu OMS Jenebra.
Durante hasoru malu, lider nain rua diskuti dalan atu hametin sira nia kooperasaun konaba asuntu saude oin-oin, liu-liu konaba Timor-Leste nia susesu iha kombate moras sira neebe bele prevenene hanesan tuberkoloze no malaria nomos hatoo nia asaun ba kampanha nasional ba Susubeen-inan iha Timor-Leste.
Lider sira mos diskuti konaba Konferensia ba Konvensaun Enkuadramentu Nasoins Unidas nian kona-ba Mudansa Klimatika (COP28) no nesesidade ba kompromisu polítiku iha nivel aas liu atu asegura katak saude iha sentru asaun klimatika nian.
Iha biban nee, PR Jose Ramos-Horta agradese ba Ghebreyesus, tanba OMS nia apoiu ba Timor-Leste.
“Nafatin iha kompromisu atu servisu hamutuk hodi hadia ema Timor-oan sira nia saude,” katak PR Horta .
Sorumutu nee hanesan pasu pozitivu ida hodi hametin liu tan relasaun entre Timor-Leste no OMS, no hein katak sei lori dalan foun no inovador atu hadia rezultadu saude iha Timor-Leste.
Aleinde nee, Prezidente Simu Premiu Prestijiozu dona Maria de las Nieves of Parma iha Jenebra, premiu ida nee hanesan rekonhesimentu ba Xefi Estadu nia esforsu neebe la para atu defende pas no independensia iha Timor-Leste.
(eme)
