DILI, STLNEWS.co – Prezidente Republika (PR) Jose Ramos Horta husu IX Governu atu tau atensaun ba taxa neebe oras nee sae makaas iha rai laran.
Prezidente Republika Jose Ramos Horta hatoo kestaun nee ba jornalista sira iha Aeroportu Nicolao Lobato Komoro, bainhira remata vizita estadu ba Republika Alemanha, Kuarta nee (28/06/2023).
Nia hatete, governu foun prezisa halo revizaun ba taxa importasaun neebe daudaun nee folin sae makaas, fo impaktu ba povu kiik sira.
“Ida nee governu tenki haree sukat didiak, maibe tenki haree didiak. Primeiru analisa tanba sa mak folin sasan sae, hau konkorda Timor Leste tenki haree kestaun ida nee didiak, maibe ita tama daudaun ona ASEAN, ita nia tarifa labele aas liu fali ASEAN nia, labele aas liu fali akordu neebe ita halo iha integradu,” katak nia.
Buat sira nee labele halo izolamente, tenki haree didiak ho parseiru ASEAN para labele konflitu fali ho obrigasaun sira.
Xefe Estadu hatete, uluk antes pandemia kontetor ida mai husi Xina rihun 4, depois sae ba rihun 13, rihun 14, depois Portu Dili karu tebes kada loron, demora kada loron depois kustu nee ba konsumidor, tanba laos importador esportador mak selu, nee sira transfere.
Aman nasaun nee dehan, ho Portu Tibar foun neebe atu movimenta kontetor barak liu lozikamente folin investe, atu tun mais sae fali. Nee mak konfuzaun iha rasasino iha Timor Leste, ida nee PR husik ba espesialista sira ho governu nia para diskuti.
“Hau hanoin mak nee, situasaun ekonomikamente difisil ita labele halo povu neebe kiak, funsionariu sira ema hotu, profesores sira vensimentu kiik los, ita halo difisil tan ba sira ho aumenta impostu,“ katak nia.
Prezidente hatete, se governu hasae taxa masi midar ida nee PR la preokupa, tanba PR rasik apelu ba iha komunidade favor bele redus hemu masimidar, tanba problema diabetes nee sei sai pandemia ida iha Timor Leste, no diabetes nee pandemia ida iha Xina, India, Amerika no rai barak, tanba konsumu masimidar no koka kola barak demais.
PR Horta mos sujere ba inan sira neebe mak halo dose, atu halo dose faan uza bani been nee produtu natural, tanba bani been saudavel, tanba nee husu labarik sira atu labele hemu koka kola, spirite ho buat midar sira nee, diak liu hasae taxa makaas ba sasan sira nee.
(eme)
