DILI, STLNEWS.co – Prezidente Republika (PR) Jose Ramos Horta husu seguransa nomos Munisipiu Dili atu labele duni negosiante neebe faan sasan iha dalan ninin, tanba sira nia moris ho faan sasan hodi hetan osan sustenta familia.
Prezidente Republika Jose Ramos Horta hatoo lia hirak nee liu husi nia aprezentasaun bainhira halo enkontru ho negosiante sira iha Palasiu Prezidente Bair Pite, Sesta (28/07/2023).
“Hau haree iha notisia, akompanha, no dala ruma hau rasik fo sai ona para polisia ka munisipiu labele duni sai povu kiak neebe loron-loron ho honestidade buka osan, obrigasaun no kompetensia munisipiu nia atu buka solusaun diak ba ordenamentu ordem iha sidade laran, la signifika labele halo negosiu iha fatin hotu, tenki buka fatin ida diak ba sira,” dehan PR Horta.
Prezidente Republika hatete, iha rai barak iha mundu ema faan sasan iha estrada ninin sira, tanba nee Timor oan mos bele faan, importante la atrapalha ema seluk nia moris.
“Mezmu faan sira nia sasan iha estrada ninin nee la atrapalha ema seluk nia moris, iha rai barak iha mundu iha amerika, Europa, iha fatin barak ema halo negosiu iha estrada ninin, tanba iha estrada ninin nee iha tortaar nee luan o bele monta iha neeba didiak, munisipiu dadersan mai hamoos tiha des-imfeta fatin nee didiak para aileba sira, kiak sira mai fatin nee moos, des-imfektadu fatin nee mos laiha bakteria bele faan iha estrada ninin, laos iha estrada klaran, maibe estrada ninin,” katak nia.
Prezidente hatete, tuir nia haree sidadaun aileba neebe mak faan mos iha aeroportu nia oin mos diak, tanba la atrapalha buat ida, maibe iha kondisaun aat tebes, tanba tinan hirak nia laran governu la hadia kondisaun ba aileba sira.
“Munisipiu hatene deit mak duni ema, nee duni hau husu ba munisipiu favor halo imi nia knaar, buka hadia kondisaun diak ba povu neebe moris ho faan modo, faan hudi, faan saida deit, enkuandu solusaun definitivu laiha hanesan merkadu popular ida fatin neebe luan, kondisaun hijine,” katak nia
Nia hatutan presiza hadia fatin merkadu sira ho mos no hijine, nunee labele fo impaktu ba negosiante sira nia saude.
“Tanba imi kontribui diak ba rai ida nee nia, imi la husu, laos hanesan asesor sira, funsionariu sira barak los la halo buat ida manan osan deit, la halo buat ida, maibe imi nee kontribui mak hetan osan, tanba sa munisipiu duni fali imi,” katak nia.
Horta hatutan, munisipiu hatudu nia matenek iha nia lideransa labele halo ema vitima la ho dignidade, “hau husu ba munisipiu para ida nee haree buka fatin dignu para imi kontinua faan, hau hatete imi labele tauk,” katak nia.
(eme)
