DILI, STLNEWS.co – Prezidente Republika Jose Ramos Horta durante partisipa iha Asembleia Nasaun Unidas iha Nova Yorke koalia mos ho Organizasaun Mundial Saude (OMS), oinsa hamutuk hodi tau matan halo prevensaun ba moras dengue, malaria no tuberkuloze iha Timor Leste.
Prezidente Republika Jose Ramos Horta hatoo lia hirak nee ba jornalista sira, bainhira remata partisipa Asembleia Nasaun Unidas iha Aeroportu Internasional Nicolao Lobato Komoro, Tersa (26/09/2023).
“Enkontru ho OMS koalia liu-liu ba oinsa Timor Leste ho komunidade internasional tomak hamutuk ho parseiru sira nasaun OMS tau matan liu ba moras sira hanesan dengue, malaria, tuberkuloze, tanba iha estatistika Timor nia problema tuberkuloze, TBC nee aas tebes, iha mos dadus estatistika neebe OMS aprezenta, ita nia Ministeriu Saude mos partisipa iha enkontru nee, dadus barak mos pozitivu iha TL, nia progresu tinan sira nia laran,” dehan Horta.
Xefi Estadu hatete, problema sira tuberkuloze ligadu ho nutrisaun, ligadu ho bee moos, ligadu ijiene uma, ezemplu se laiha bee moos, bee bakteria barak nee kontribui ba sub nutrisaun, laos deit tanba hahan laiha, maibe ho problema oin-oin iha uma laran la ijiene, buat sira nee OMS halo tiha ona planu kampanha boot para tinan 5 mai nee investimentu makaas liu iha saude preventiva, moras barak neebe bele prevene deit, ho edukasaun ijiene.
Horta hatete, tuberkuloze problema boot ida iha Timor Leste, dala barak sidadaun sira ba liur servisu iha Australia, maibe halo teste barak hetan moras sira nee, no halo rekrutamentu ba forsa armadas balun la liu tanba moras TBC.
(eme)
