DILI, STLNEWS.co – Prezidente Republika Jose Ramos Horta hatete, nia iha konfiansa 100% ba ASEAN sei rezolve problema iha nasaun Mianmar.
Prezidente Republika Jose Ramos Horta hatoo lia hirak ba jornalista sira, bainhira remata palestra datoluk Timor Leste iha ASEAN ho tema “Roteiru”bazeia ba kriteriu objetivu iha Palasiu Prezidensial Republika Bairo Pite, Kinta (10/08/2023).
“Problema Mianmar hau konfia 100% matenek kapasidade lider sira ASEAN atu hetan solusaun, hau konfia sira. Sira iha esperensia tinan dekada ba dekada, Ministeriu Negosiu Estranjeiru ASEAN nia kompotente hau admira sira, tanba ema mesak matenek deit ho esperensia,” katak Horta.
Preziente Republika nia tau konfiansa ba ASEAN, tanba iha ASEAN laran ema mesak matenek no iha esperensia hotu, tanba nee nia fiar loron ida sei rezolve problema iha Mianmar rasik.
Xefi Estadu hatete, sei lori tempu difisil ba sira hanesan konselhu seguransa potensia nuklear nain lima permanente nee, sira la konsege rezolve Ukraina, la konsege rezolve Yaman, Siria, Livia, hau espera ASEAN rezolve tempu badak lae, maibe ho matenek neebe iha sei rezolve.
“Bele milagre akontese, militar sira iha neeba hanoin fila fali, tanba rezistensia iha Mianmar makaas los, povu tomak mobilizadu luta kontra militar sira, militar sira kontrola deit 30% teritoriu Mianmar nia, portantu hau fiar, Timor la interfere la interven iha prosesu ida nee,” katak nia.
Xefi Estadu hatutan, Timor Leste apoiu mak pontu lima ASEAN nia neebe atu rezolve problema nasaun ASEAN nia.
(eme)
